Gatime nga zonja Albana, Jahni me qofte dhe patate

Jahni me qofte dhe patate

Përbërësit:

500 gr mish i grirë

1 kokërr vezë

1 thelpi hudhër

1 lgj kripë

½ lugë kafeje piper i kuq

½ lugë kafeje piper i zi

5-6 patate

1 spec

2 karrota

1 qepë

2 domate

2 gjethe dafine

1 spec djegës

1 lgj salcë domate

1 lgj miell

1 tufë majdanoz

Përgatitja:

Vendosim tek mishi i grirë një kokërr vezë, hudhrën të grirë imët, kripën, piperin e zi dhe piperin e kuq. E punojmë mirë brumin e qofteve dhe më pas realizojmë qofte në madhësi mesatare sa gropëza e dorës.

Kaurdisim në një tigan fillimisht qepën e grirë imët dhe më pas shtojmë karotën dhe specin. Vazhdojmë kaurdisjen derisa perimet të zbuten pak dhe më pas shtojmë domatet e grira në rende ose të prera në kubikë dhe një lugë salcë domate. Rregullojmë shijen me kripë, piper dhe pak sheqer dhe e lemë salcën të marrë valë. Presim patatet për së gjati dhe i vendosim tek salca me speca dhe karrota. Vendosim dhe qoftet e përgatitura, dy gjethe dafine dhe një spec të vogël djegës. Hedhim ujë në masë të përbërësve dhe e lemë të gatuhet në temperaturë nën mesatare. Në fund shtojmë majdanoz të grirë imët dhe nëse e duam lëngun të trashë mund të shtojmë pak miell.

MC/Shqiptarja.com

TAG:
• jahni
• recete
• zonjaalbana