Receta

Gatime nga zonja Albana, Sarma me lakra të ëmbla

Në këtë hapësirë të faqes tonë do të gjeni mënyrën e përgatitjes së recetave të gatimit të ideuara nga Zonja Albana. Këto receta Zonja Albana i gatuan çdo ditë në emisionin Rreze Dielli nga ora 08 : 45 – 10 : 00

Redaksia 5 Nëntor 2021, 10:20 | Përditesimi: 5 Nëntor 2021, 10:21

SARMA ME LAKRA TË ËMBLA

Përbërësit:

1 kokë lakër me fletë të holla

LEXO EDHE:
Gurabijet 5-lekëshe të nostalgjisë nga zonja Albana

2 lgj uthull

2 qepë

2 lgj gjalpë

800 gr mish i grirë

1 vezë

1 lgj salcë speci

1 filxhan kafeje oriz

1 lugë ajkë

Kripë, piper

Për buljonin:

500 gr domate

1 qepë

1 spec

1 lgj vaj ulliri

Pak vegetë

Majdanoz

Përgatitja:

Fillimisht presim lakrën dhe largojmë koçanin. E vendosim në një tenxhere me ujë të nxehtë me 2 lugë uthull dhe e lemë në zjarr të ulët të ziejë derisa të ndahen fletët nga mesi dhe mos të dëmtohen. Kullojmë ujin, shkëpusim fletët njëra nga tjetra dhe i lemë të ftohen.

Në gjalpë të nxehtë kaurdisim qepën e grirë hollë derisa të zverdhet. Shtojmë salcën e specit, mishin e grirë dhe orizin. Vazhdojmë kaurdisjen për 5 minuta dhe më pas e largojmë nga zjarri dhe shtojmë kripë, piper, një lugë ajkë dhe një vezë të rrahur. E përziejmë mirë dhe e lemë të ftohet.

Ndërkohë pastrojmë fletët e lakrës nga denjtë. Vendosim nga një lugë mbushje me mish të grirë dhe mbështjellim sarmat duke i vendosur në rradhë në një tenxhere ku kemi shtuar si bazë disa fletë lakre.

Presim domatet në copa të vogla dhe i vendosim në zjarr për t’u vluar së bashku me 1 qepë të prerë në disa pjesë, 1 spec dhe majdanoz të grirë. Më pas kullojmë buljonin, I shtojmë pak yndyrë dhe vegetë dhe e hedhim mbi sarmat. I mbulojmë në fund sarmat me disa fletë lakre dhe një pjatë. Vendosim kapakun dhe i lemë të ziejnë në zjarr të ulët për 1 orë e gjysëm – 2 orë.