Gazetarja italiane Cecilia Sala qëndron e burgosur në një qeli pa shtrat, Roma thirrje Iranit: Të lirohet menjëherë

Cecilia Sala ka nevojë për vendin e saj, Italinë. Gazetarja arriti të telefononte dje - pas ditësh heshtjeje, familjen e saj - për të treguar rreth gjendjes së saj dhe për të kërkuar një ndërhyrje:

«Duhet vepruar shumë shpejt», ka përsëritur disa herë. Kush ka mundur të flasë me prindërit e saj, të cilët po përballojnë këto ditë jashtëzakonisht të vështira me diskrecion maksimal, i ka gjetur ata veçanërisht të shqetësuar nga toni dhe përmbajtja e bisedës: Cecilia është shumë e tronditur nga ndalimi në burgun e Evin-it, kushtet në të cilat po mbahet janë tejet të vështira.

Gjatë bisedës janë zbuluar detaje për atë që po ndodh në burg, duke konfirmuar se lirimi i gazetares është një prioritet absolut, siç e ka kujtuar edhe presidenti Sergio Mattarella në fjalimin e tij të fundvitit.

Kushtet e ndalimit

Sala flen në dyshemenë e qelisë, me dy batanije, një poshtë dhe një sipër. Nuk ka shtrat. Ajo ndodhet në izolim të plotë prej katërmbëdhjetë ditësh. Kjo do të thotë se nuk ka kontakte me asnjë person, përveç rojeve të saj. Fytyra e vetme jo armiqësore që ka parë për dy javë ka qenë ajo e ambasadores Paola Amadei. E ka takuar për tridhjetë minuta, gjithmonë në praninë e rojeve, të cilat kërkuan që të flitej anglisht për të kuptuar të gjithë përmbajtjen e bisedës. Ambasadorja Amadei i kishte sjellë një pako me disa produkte higjiene, rroba, një panetone dhe sidomos një maskë për sytë që do t’i shërbente Cecilias për të pushuar: në qelinë e saj, si dhe në të tjera të izolimit, ka “torturën e bardhë” me dritën gjithmonë të ndezur, duke i detyruar të burgosurit të mos dinë kur është ditë dhe kur është natë, pasi nuk bëhet kurrë errësirë.

Zyrtarët e Ministrisë së Jashtme të Iranit kishin siguruar ambasadën tonë që pakoja i ishte dorëzuar asaj më 30 dhjetor, aq sa ishte përgatitur një e dytë. Por dje Sala tregoi se jo, ajo nuk e kishte marrë atë pako: rregullat për sendet që mund të hyjnë në qeli janë shumë të rrepta; nuk lejohen as syzet.

Sala ka marrë vetëm një lidhëse për flokët. Në telefonatën e mëparshme kishte treguar se për Krishtlindje i ishin ofruar «dy cigare gjigante» për të tymosur, ndërsa kishte ngrënë oriz me pulë dhe gjashtë hurma. Edhe telefonatat me familjen dëgjohen nga rojet. Aq sa familja kishte arritur në përfundimin, në kontaktin e parë, se ajo po lexonte një fletë. Nuk ishte e mundur të flitej për kushtet e saj të ndalimit apo për akuzat e ngritura ndaj saj. «Nëse flasim për gjëra normale, mund të flasim më gjatë», kishte thënë ajo.

Reagimi i qeverisë italiane

Telefonatat e djeshme duket se kanë rritur dëshpërimin te familjarët dhe te të gjithë ata që gjatë këtyre orëve kishin marrë për të mirëqena sigurimet që dukeshin se vinin nga Irani. Nuk ka pasur asnjë përmirësim të kushteve në burgun e Evin-it. Për këtë arsye, dje qeveria italiane iu përgjigj Iranit me një dokument zyrtar. I kërkoi Teheranit «garanci të plota për kushtet e ndalimit» dhe «lirimin e saj të menjëhershëm». «Kohëzgjatja dhe mënyrat e ndalimit do të jenë një tregues i qartë i qëllimeve dhe qëndrimit të sistemit iranian ndaj Republikës Italiane», thanë nga Ministria e Jashtme italiane.

Ka gjasa që në orët e ardhshme të ketë një tjetër ndërveprim formal, në të cilin Italia, sipas burimeve qeveritare, do t’i shpjegojë Iranit se «rasti Sala është rasti i Italisë. Ajo që i ndodh gazetares sonë në burg është ajo që Irani po u bën italianëve».

Rasti i Najafabadit

Ky është mesazhi që iranianët i kanë dhënë Romës për Mohammad Abedini Najafabadi, qytetarin e arrestuar në Malpensa më 16 dhjetor me kërkesë të Shteteve të Bashkuara. Avokati i tij ka kërkuar arrest shtëpiak për ta kryer në një apartament të vënë në dispozicion nga konsullata, për të kufizuar rrezikun e arratisjes.

Burri, që ndodhej në burgun e Rossano-s, ku mbahen të dyshuarit për terrorizëm, është transferuar në burgun model të Operës. Atij i është dhënë edhe një tablet. Ai ka pasur kontakte të vazhdueshme me familjen dhe i ka treguar avokatit të tij, Alfredo di Francesco, se kishte mësuar për rastin e Sala-s duke parë televizionin. «Unë jam një akademik, një studiues: sigurisht që nuk jam terrorist. Nuk e kuptoj pse jam arrestuar», ka thënë ai.

K.M/Shqiptarja.com

TAG:
• itali
• iran
• Cecilia Sala