Vulin iu ka treguar gazetarëve kosovarë në Graçanicë se edhe atij, sikurse edhe serbëve tjerë të zhvendosur nga Gjakova, i është ndaluar hyrja dhe iu është pamundësuar vizita në kishën në Gjakovë.
“Në ditën e sotme është dëshmuar se aparteidi ende qeverisë në këto hapësira për serbët. Serbët janë populli i fundit në Evropë të cilët nuk mund të shkojnë në kishat e tyre”, ka thënë Vulin për mediat serbe, duke shtuar se ky është aparteidi i fundit në Evropë.
Vulin, për ngjarjet e sotme, ka akuzuar përfaqësuesit e qeverisë së Kosovës. Ai ka pyetur se kë ka penguar pjesëmarrja e më pak se 100 serbëve të zhvendosur të Gjakovës, të cilët kanë ardhur vetëm ta vizitojnë kishën.
Ai ka bërë me dije se njëherë i është lejuar vizita së bashku me serbët e zhvendosur, mirëpo ky vendim është tërhequr mbrëmë. Ai ka thënë se kjo nuk çon në normalizim marrëdhëniesh mes Kosovës e Serbisë.
“Serbët sot janë gjuajtur me gurë në Gjakovë. Mua më është ndaluar madje të jem edhe me ta”, ka thënë Vulin, i cili ka shtuar se dëshiron të shkojë në Deçan e të bisedojë me gjakovarët.
Vulin i ka bërë thirrje shqiptarëve që të mos i ndajnë viktimat në të tyre dhe tanët dhe të lejojnë kthimin e të zhvendosurve.
Kryetarja e bashkisë së Gjakovës, Mimoza Kusari-Lila, e cila mbrëmë përmes një reagimi në Facebook i bëri thirrje Vulinit që të mos e vizitojë Gjakovën, ka reaguar sërish, duke thënë se 'me kërcënime nuk arrihet asgjë".
“Çfarë u paralajmërua mbrëmë, nuk ndodhi. Ministri i Serbisë nuk e vizitoi Gjakovën. Përkundrejt deklarimit të tij për të bërë një gjë të tillë, ai nuk kishte leje të vizitojë komunën tonë. MPB e Kosovës nuk e kishte lejuar të vinte në Gjakovë që nga tre janari. Megjithatë, insistimi i tij për të ardhur bëri që qytetarët e revoltuar të ndalojnë edhe autobusët me pelegrin dhe të mos i lejojnë as ata të hyjnë në kishë. Ishte hera e parë që pelegrinët u ndaluan. Nuk ishte situatë e lehtë, por u evitua më e keqja. Shpreh falënderimin tim të veçantë për forcat e rendit dhe menaxhimin profesional të situatës nga ana e tyre”, ka shkruar Kusari –Lila në Facebook.
Redaksia Online
(mag/shqiptarja.com)
![](https://www.shqiptarja.com/template/img/sh_logo1.png)