Gjirokastër,pallati drejt shembjes,
Eksperti:Banorët të kthehen,s'ka rrezik

Drejtori i shërbimit gjeologjik në Gjirokastër, Çano Nora, ka zbardhur përfundimet e hulumtimit të specialistëve të Institutit të Gjeologjisë në Tiranë, lidhur me pallatin 5-katësh, që rrezikon të shembet. Drejtori iu bëri thirrje të gjithë banorëve të kthehen në banesat e tyre dhe t’i kthehen jetës normale, pasi bazuar në studimin e fundit nuk ka më rrezik për jetën.

"Shërbimi Gjeologjik Shqiptar në bazë të një studimi pas studimeve të autorëve të ndryshëm për këtë zonë dhe të dy studimeve të njëpasnjëshme, që u kryen pasi ndodhi kjo, arritën në përfundimin që pallati nuk përbën rrezik dhe banorët të rrinë në banesat e tyre dhe t’i kthehen jetës normale", tha Nora.

Si ndryshoi qëndrimi i ekspertëve?
U bë një studim më i hollësishëm, u panë me imtësi të gjitha studimet, u bë monitorimi dhe u arrit në këtë përfundim. Bashkia do ta monitorojë në vazhdimësi këtë zonë dhe situatën, do të punohet me projekte afatshkurtër dhe afatmesëm, do të bëhen punime inxhinierike

Shkalla e qëndrueshmërisë është ende e ulët, si mund të qëndrojnë banorët brenda?
Banorët le të qëndrojnë brenda, do kryhet një projekt afatshkurtër. 


(Raporti i rivlerësimit i Institutit të Gjeologjisë, i siguruar nga Report Tv)

Ndërkohë, vetëm një ditë më parë, Prokuroria ka nisur një procedim penal për shpërdorim detyrë për dy zyrtarë të Bashkisë Gjirokastër për pallatin 5-katësh në lagjen "Punëtori". Zyrtarët e paditur janë Vullnet Tola, përgjegjës i Inspektoratit Ndërtimor Urbanistik Vendor (INUV) dhe Aleksandër Pesha inxhinier në zyrën e bashkisë.

d.c./shqiptarja.com