Gjykata e Lartë,Nishani konsultime 
Paloka: Rama do të kapë drejtësinë

TIRANE - Presidenti Bujar Nishani ka zhvilluar sot konsultimet me kryetarët e grupeve parlamentare për të gjetur një konsensus për përcaktimin e 2 anëtarëve, që do të vihen për të plotësuar vakancat në Gjykatën e Lartë.

Në dalje të mbledhjes me Presidentin Nishani, pas konsultimeve për dy anëtarët e Gjykatës së Lartë, kreu i i grupit parlamentar të PD, Edi Paloka tha se opozita mbështet çdo kandidaturë të Presidentit Nishani, ndërsa shtoi se mazhoranca ka vendosur të hedhë poshtë kandidaturat pasi kryeministrit Edi Rama sipas tij ka vendosur të vërë në dorë drejtësinë.

Pas konsultave me Presidentin Nishani për kriteret që nevojiten për të plotësuar vakancat në Gjykatën e Lartë, kreu i grupit parlamentar demokrat, Edi Paloka ka akuzuar Kryeministrin Rama se ai po kërkon të uzurpojë sistemin e gjyqësorit. Një ditë më parë, gjatë mbledhjes së grupit të PS, Kryeministri Rama theksoi nevojën e reformimit rrënjësor të sistemit të drejtësisë në vend.

"Profesionalizimi, morali i gjyqtarëve janë kriteret bazë. Jam i kënaqur që këtë ka zgjedhur edhe presidenti. Ne do të mbështesim çdo kandidaturë, por Rama ka vendosur të hedhë poshtë çdo kandidaturë. Duket se Rama edhe drejtësinë kërkon ta vërë në dorë. Të gjitha sulmet tregojnë qartazi se kalaja e fundit është drejtësia, por ne vijojmë të qëndrojmë për një drejtësi të pavarur siç e do BE. Rama s’do ta marrë këtë kala sepse ky do të ishte fundi i demokracisë. Rama që flet për problemet që në fakt janë, synon të rikthejë drejtësinë ku në krye ishin ministra të PS. Sigurisht nuk do të lejojmë një drejtësi kur akuzohen nga Rama lihen në burg, e nga Basha lihen të lirë."-theksoi Paloka.

(Presidenti Nishani në konsultim me kreun e Grupit Parlamentar të PD, Edi Paloka)

Ndërkohë,në konsultat e bëra, krerët e grupeve parlamentare të PS dhe LSI,Gramoz Ruçi dhe Petrit Vasili, kanë vendosur të mos komentojnë takimet e tyre me Presidentin Nishani. Në takime për konsultat të pranishëm qenë dhe nën kryetari i PDIU-së, Tahir Muhedini si dhe kreu i Republikanëve Fatmir Mediu. Konsultat vijnë në vazhdën e diskutimeve mes politikës pas refuzimit në Parlament të kandidaturës së Alaudin Malajt, sjellë nga Presidenti Nishani.


(Presidenti Nishani në konsultim me kreun e Grupit Parlamentar të PS, Gramoz Ruçi)

(Presidenti Nishani në konsultim me kreun e Grupit Parlamentar të LSI, Petrit Vasili)

(Presidenti Nishani në konsultim me kreun me nën kryetarin e PDIU-së, Tahir Muhedini)

(Presidenti Nishani në konsultim me kreun e PR, Fatmir Mediu)




Disa javë më parë Kuvendi rrëzoi emrin e sjellë nga Nishani, atë të Alaudin Malajt për postin e anëtarit të Gjykatës së Lartë. Nishani njoftoi disa ditë më parë nisjen e procedurave ligjore për plotësimin e vendeve vakante në Gjykatën e Lartë.


Redaksia Online
(a.h/shqiptarja.com)

TAG:
• gramoz ruçi