Juventusi u imponua në shtëpi dhe mposhti 2-0 Udinesen në raundin e 1/8-ave të Kupës së Italisë, teksa në çerekfinale do përballet me fituesin e çiftit Atalanta - Genoa.
Në "Allianz Stadium", Juvja ishte më kërkuese dhe gjeti golin pas 23 minutave lojë. Një krosim nga e djathta e sulmit bëri që David të 'detyronte' Palmën të shënonte në portën e tij.
Mbrojtësi 17-vjeçari ishte i pafat edhe në minutën e 66-të, kur shkeli në këmbë një nga sulmuesit e Juves, me VAR dhe arbitrin që akorduan penallti. Nga pika e 11 metërshit nuk gaboi Locatelli që qetësoi bardhezinjtë me golin e dytë.
Në minutën e 84-t në fushë u fut Edon Zhegrova, që në dhjetë minuta lojë (bashkë me shtesat) dhuroi spektakël sa herë që prekte topin. "Zonja e Vjetër" shënoi në sekondat e fundit me Lois Opendan, por goli u anulua për pozicion jashtë loje.
Kështu, Juvja fitoi 2-0 kundër Udineses dhe pret emrin për përballjen çerekfinale të Kupës. Tetë ndeshja radhazi pa humbje për Juven, që duket se po rikthehet në formë.
Gabim i rëndë nga VAR, Juventusit iu anulua goli i rregullt kundër Udineses
Tifozët e Juventusit kanë shpërthyer në rrjetet sociale pas anulimit të golit të Jonathan David në minutën e 34-të të sfidës së Kupës së Italisë kundër Udineses.
Asistenti i gjyqtarit Francesco Fourneau sinjalizoi pozicion jashtë loje, vendim që u verifikua nga VAR-i dhe teknologjia SAOT (pozicion jashtë loje gjysmë-automatik). Por kuadri i shfaqur në transmetim ka ngritur shumë pikëpyetje, pasi në pamje shihet Bertola në qendër të zonës së penalltisë, jo Palma, lojtari që tifozët e Juves pretendojnë se mbante në linjë Davidin.
Goli i David u anulua për pozicion jashtë loje, duke ndezur polemika të mëdha rreth kuadrit të përdorur në TV.