‘Qytetarët i grabisja sepse kisha kredi për të larë’! Report Tv mëson se kështu deklaruar punonjësi i policisë bashkiake të Tiranës, Sajmir Muzikanti, një ditë pasi u arrestua bashkë me oficerin e rendit të komisariatit nr.1, Serxhio Cani, 22 vjeç, të cilët u merrnin para me forcë qytetarëve në zonën e Liqenit Artificial.

“Sa herë që isha turni i tretë në punë merrja në telefon Serxhion dhe i thoja hajde dalim nga Liqeni. Për shkak të kredisë që kam detyrohesha t’u merrja paratë me zor qytetarëve. Këtë gjë e kam bërë në bashkëpunim me Serxhion”, ka dëshmuar ai.

Efektivi i Rendit, Serxhio Cani dhe polici bashkiak i Tiranës Sajmir Muzikanti, 39 vjeç u arrestuan pasi kishin shpërdoruar detyrën duke ndaluar të rinj që i kapnin me cigare hashashi në zonën e Liqenit artificial në Tiranë dhe i gjobisnin.

Efektivët u vinin prangat që të dukeshin sa më të besueshëm që po bënin detyrën, dhe u merrnin nga 20 deri në 50 mijë lekë, duke i lënë më tej të lirë në këmbim që mos t’i shoqëronin në komisariat. Dy efektivët ishin në vëzhgim nga Agjencia e Mbikëqyrjes Policore, pas denoncimeve të ardhura nga qytetarët.

Mësohet se ndaj tyre ishin bërë 9 kallëzime, por vetëm 3 raste janë dokumentuar. Sakaq, kryepolici Muhamet Rrumbullaku ka nisur procedurat për përjashtimin nga Policia e Shtetit për efektivin e komisariatit numër 1, Serxhio Cani. Që kur është vendosur në krye të Policisë, Rrumbullaku deri më tani ka përjashtuar 13 efektivë.