GREQI-Një 12-vjeçar me origjinë shqiptare është dhunuar nga babai i një shokut të klasës në vendin fqinj. Ngjarja e ndodhur në Peristeri është raportuar në mediat greke dhe ka ngritur shqetësim të madh lidhur me fenomenin e racizmit.

Media greke që është marrë më shumë me çështjen tregon videon, ku burri mban të shtrirë 12-vjeçarin, i bërtet dhe në një moment i përplas kokën në tokë.

Nxënësi shqiptar ka treguar se kishte pasur edhe zënka të tjera me shokun e klasës, ndërsa për ngjarjen e fundit, ai tregon se bashkëmoshatari e kishte ofenduar dhe mallkuar dhe se ai i ishte përgjigjur në të njëjtën mënyrë.

“Unë po ecja me biçikletë, pastaj erdhi shoku i klasës dhe filloi të më ofendonte e mallkonte për vendin tim dhe unë bëra të njëjtën gjë. Ai më goditi më pas dhe pastaj erdhi dhe babi i tij dhe më goditi. Më kapi nga flokët dhe ma përplasi kokën në tokë”, ka treguar i mituri.

Pas sulmit, i mituri shqiptar u dërgua në spital , ku pas kontrollit dhuna nga autori i kishte shkaktuar frakturë në qafë.

Prindërit e fëmijës shqiptar shprehen se po mendojnë që të ndërrojnë shkollën e djalit të tyre, pikërisht për shkak të sulmeve të vazhdueshme që ata po ndeshin, ndërsa theksuan se do t’i drejtohen edhe gjykatës për ngjarjen e ndodhur.