Pikat e bllokimit në akset rrugore në Greqi kalojnë numrin 80 sipas CNN Greece, ndërsa nga e mërkura mobilizimet do të përshkallëzohen me bllokimin e Urës Rio-Antirio në Patras dhe portit të Volosit. Ai i Selanikut synohet të bllokohet të premten.

Dy akset rrugore Veri-Jug dhe Lindje-Perëndim, Rruga Kombëtare Athinë-Selanik dhe Autostrada Egnatia, vazhdojnë të jenë të mbyllura ndërsa kalimet kufitare hapen dhe mbyllen herë pas here përfshirë atë të Kakavijës ku kalojnë shqiptarët.
Pasditen e së hënës fermerët në Kretë u përplasën me policinë dhe hynë brenda aeroportit në Heraklion I cili u rihap këtë të martë herët me policinë Greke që ashpërsoi qëndrimin e saj.

Nga ana e saj, qeveria po përgatit gjithashtu një “paketë” masash, të cilën mund t’ua paraqesë fermerëve në rast takimi javën e ardhshme.

Në “tryezë” është mundësia e ripërcaktimit të sasive të naftës bujqësore për kulturë bujqësore dhe zgjerimi i programit që garanton një çmim të ulët të energjisë elektrike prej 9.2 cent/kËh.

Fermerët zhvilluan mbrëmjen e së hënës një mbledhje në Egiliak u vendosën lëvizjet e tyre të ardhshme.

Protestat e fermerëve grekë kanë nisur pas skandalit me subvencionet europiane, me të cilat abuzohej në mijëra dosje nga fermerë dhe zyrtarë grekë, çka çoi në pezullimin e lëvrimit të fondeve. Për to janë duke u zhvilluar hetime edhe nga autoritetet e brukselit dhe nga ato greke, ndërsa bllokadat kanë hyrë në javën ë dytë.

Rendit zhvillimet sipas orarit:
Ora 16:54
Greqi/ Protestat e fermerëve bllokojnë sërish aksin Kakavijë-Janinë, qarkullimi do të jetë i lirë vetëm për automjetet e emergjencës

1765295780_greqi.webp

Për shkak të protestës së fermerëve në Greqi, aksi rrugor Kakavijë-Janinë do të bllokohet. Funksionimi i këtij aksi rrugor do të kufizohet në fashën orare 19:00 deri në orën 22:00 (me orën greke).

Policia Kufitare Greke informon se për të qarkulluar do të lejohen vetën automjetet e emergjencave.

“Policia Kufitare Kakavijë, nëpërmjet qendrës së përbashkët të shkëmbimit të informacionit Kakavijë, është njoftuar nga Policia Kufitare Greke se ditën e sotme, nga ora 19:00 deri në orën 22:00 (me orën greke), aksi rrugor Kakavijë–Janinë, në kryqëzimin e fshatit Kallpaq, do të jetë i bllokuar për shkak të protestës që do të zhvillojnë fermerët.

Do të lejohen të qarkullojnë vetëm automjetet që do të kenë emergjenca shëndetësore.

Policia Kufitare Kakavijë kërkon mirëkuptimin e qytetarëve dhe sugjeron planifikimin e udhëtimeve me automjete, në orare të tjera të ditës”, thuhet në njoftim.

Greqia është “paralizuar” prej ditësh nga protestat e fermerëve, të cilët kanë bllokuar akset kombëtare për vonesat me dhënien e subvencioneve të BE-së pas një skandali korrupsioni. Ata janë të vendosur të vazhdojnë dhe të intensifikojnë protestat e tyre nëse kërkesat nuk u plotësohen nga qeveria.

K.B/Shqiptarja.com