Greqia e futbollit në 'rënie të lirë', ndjek Shqipërinë nga televizori! Tetë vite zhgënjim dhe emra 'anonim' në ekip

Është koha e Shqipërisë. Kuqezinjtë në tetë vitet e fundit ia kanë dalë të jenë dy herë pjesë e fazës finale të Europianit. Për herë të parë në Francë dhe tanimë në Gjermani, futbolli ynë është i lidhur edhe me shkëlqimin e djemve që kanë lindur dhe zhvilluar veprimtarinë në Evropë.

Shqipëria e futbollit ka një rritje duke bërë krahasimin me vendet e Ballkanit. Nëse lëmë pas Kroacinë e cila investon shumë te moshat, ekipi ynë ka bërë një performancë të mirë.

Krahasuar me fqinjët e Greqisë, tanët në grumbullimin e fundit vlejnë afro 20 milionë euro më pak se helenët në totalin e ekipit, por kuqezinjtë me emra bëjnë pjesë në skuadra më të rëndësishme.

Kombëtarja kuqezi vlen 123.05 milionë euro dhe me Brojën më të shtrenjtin (28 milionë). Nëse lojtarët tanë bëjnë pjesë në Serie A, Premier League apo La Liga, te Greqia pjesa dërrmuese luajnë me ekipe vendase.

Kostas Tsimikas i Liverpool është lojtari më i dëgjuar, teksa edhe Mavropanos luan me Uest Ham. Pjesa tjetër janë elementë vendas, nga Olympiacos, Panathinaikos apo edhe AEK.

Greqia prej Botëorit të 2014 nuk ka marrë më pjesë në asnjë turne madhor, duke pasur një futboll në krizë dhe tanimë do shijojnë finalet e Gjermani 2024 nga televizori, aty ku Shqipëria do kërkojë të bëjë surprizën në grupin B.

S.DH/r.k./Shqiptarja.com

TAG:
• euro 2024
• kombetarja shqiptare