Guvernatori Sejko takim me Shoqatën e bankave: të vijoj kreditimi, duhet të mbështesim rimëkëmbjen ekonomike 

Guvernatori i Bankës së Shqipërisë Gent Sejko ka zhvilluar sot një takim me bordin drejtues të Shoqatës Shqiptare të Bankave, ku në fokus të diskutimeve ishte menaxhimi i situatës së krijuar nga pandemia COVID-19. Guvernatori i ka konsideruar të duhura ndërhyrjet e bëra gjatë pandemisë pasi kanë ndihmuar bizneset dhe familjet. 

E rëndësishme sipas pjesëmarrësve në takim është që sektori bankar është likuid dhe do të jap ndikim në rimëkëmbjen ekonomike. Po ashtu është diskutuar edhe për të rritjen e kreditimit të sektorëve dhe investimeve të mëdha me synim rritjen ekonomike.

Ndërkohë një fokus të veçantë ka marrë edhe teknologjia, ku është diskutuar edhe për modernizimin e mëtejshëm i sistemit të pagesave, i cili luan një rol mjaft të rëndësishëm si në edukimin dhe përfshirjen financiare të popullsisë, ashtu dhe në rritjen e formalizmit të mëtejshëm të ekonomisë, duke shërbyer njëkohësisht edhe si një masë shtesë në drejtim të parandalimit të pastrimit të parave.

Sektori bankar sipas guvernatorit e ka përballuar me sukses krizën e shkaktuar nga pandemia dhe nuk e ka ndalur kreditimin e ekonomisë si të bizneseve ashtu edhe të individëve edhe pse ka pasur shtrëngim të kushteve të kreditimit.

Vetëm në 5 muajit e parë të këtij vitit kredia e re e dhënë për bizneset e individët është më shumë se 84 miliardë lekë, me një rritje prej 15.6%. 
 

B.K./Shqiptarja.com

TAG:
• banka e Shqiperise
• gent sejko
• koronavirusi ne shqiperi