Hapi derën me kartë banke, si 23 vjeçari hyri në banesën e të afërmit e mori zarfet me 8 mijë euro! Detaje nga vjedhja në Tiranë

23-vjeçari Erni Ndoj arriti të vidhte shumën prej 8 mijë euro dhe sendet e tjera me vlerë duke përdorur një kartë banke, për të hapur derën e të afërmit të tij në zonën e Kombinatit.

Zakonisht, hyrja brenda në këtë formë bëhet tek dyert që mbyllen nga jashtë dhe për t’u hapur duhet një çelës në gjendje normale, por hajdutët arrijnë të depërtojnë brenda në banesa përmes kësaj metode. 

Rasti i konstatuar nga Komisariati nr. 6 i përket një të riu, i cili ka pasur informacion të detajuar se brenda në apartament ka para, ka ruajtur pronarët derisa kanë dalë jashtë në orët e mbrëmjes së të martës dhe ka hyrë për të vjedhur.

Paratë i riu i ka gjetur të ndarë në zarfe të ndryshme, siç vetë pronarët i kanë lënë, për të kryer pagesa të ndryshme nga një sipërmarrje vogël që kanë në zotërim. Në momentin që është arrestuar, paratë i janë gjetur të plota, të tubuara në një vend të vetëm.

Fillimisht pronarët e banesës nuk kanë pasur asnjë dijeni se ai mund të ishte autori, por policia i këshilloi të përhapnin fjalë gjithandej nëpër miqësitë e tyre që janë përftuar profile ADN dhe autori është identifikuar. 23-vjeçari me origjinë nga Rrësheni, i frikësuar, ka telefonuar një tjetër të afërm të familjes, i cili më pas njoftoi policinë, informoi gazetari i Report Tv, Sokol Dema.

Lajmi kryesor:

EMRI/ Vodhi mbi 8 mijë euro dhe flori në banesën e të afërmit të tij, vihet në pranga 23-vjeçari në Tiranë          

S.G/Shqiptarja.com

TAG:
• Tirane
• policia e tiranes
• Erni Ndoj
• vjedhje