Haxhinasto: Nuk ka stabilitet
po munguan të drejtat e njeriut

Zv.Kryeministri dhe Ministri i Punёve tё Jashtme tё Republikёs sё Shqipёrisё, Z. Edmond Haxhinasto, mbajti sot një fjalë përshëndetëse gjatë ceremonisë vjetore në përkujtim të Ditës Ndërkombëtare të të Drejtave të Njeriut, organizuar nga zyra e Pranisë së OSBE-së në Tiranë.

Në takim ishin të ftuar personalitete të larta të qeverisë, parlamentarë, Ambasadorë të akredituar në Shqipëri, drejtues të organizatave që veprojnë në fushën e mbrojtjes së të drejtave të njeriut, etj.

Në fjalën e tij Ambasadori Wollfarth vuri theksin në rëndësinë që ka kjo ditë në emër të nderit dhe dinjitetit të qënieve njerëzore, duke u ndalur veçanërisht në edukimin në familje me frymën e respektit dhe tolerancës ndaj tjetrit.

Ministri Haxhinasto, në fjalën e tij tha se “çdo sistem nuk mund të ketë paqe dhe stabilitet afatgjatë pa respektimin e të drejtave të njeriut”. Në vijim, ai përmendi progresin e bërë nga Shqipëria gjatë këtyre 20 viteve demokraci si dhe vlerësoi se kontributi i Shqipërisë për të drejtat e Njeriut do të vazhdojë edhe më tej.

“Duke vlerësuar se Shqipëria mbetet një model shembullor i harmonisë dhe i bashkëjetesës fetare dhe kulturore, ne synojmë të organizojmë në Shqipëri Konferencën e nivelit të lartë të OSBE-së për Tolerancën dhe Mos Diskriminimin në vitin 2013. Këto arritje të jashtëzakonshme të Shqipërisë në fushën e respektimit të të drejtave të njeriut, janë bërë të mundura sigurisht edhe falë kontributit të vazhdueshëm të OSBE-së, ndaj unë përfitoj nga rasti të falenderoj në emër të të gjithë qeverisë shqiptare, të shtetit shqiptar, Ambasadorin e OSBE-së, për kontributin që ka dhënë kjo organizatë, për respektimin e të drejtave të njeriut në Shqipëri” u shpreh Haxhinasto

TAG:
• OSBE