Hetimet/ Ja si e futi në kurth 
policinë telefoni i Gazmend Çollakut

Rrëmbimi, vrasja,zhdukja e provave dhe çorientimi i policisë, ka qënë gjithçka e planifikuar nga autorët e vrasjes së Gazmend Çollakut. Autorët e vrasjes së tij, kanë organizuar çdo gjë në detaje, ku fillimisht janë paraqitur në lokalin ku qëndronte Çollaku me veshje policie e më pas janë larguar drejt Tiranës me një automjet tip “Audi”.

Mirëpo veprimi që ka futur në kurth policinë e Durrësit dhe atë të Tiranës ka qënë hedhja e telefonit të viktimës në një rrugë dytësore në zonën e Maminasit. Telefoni i viktimës nuk është fikur por lënë i hapur qëllimisht. Pikërisht në zonën e Maminasit është lokalizuar dhe aparati telefonik nëpërmjet antenave celulare. Pikërisht në këtë zonë policia ka shtuar kontrollet për gjetjen e Gazmend Çollakut, kontrolle këto që kanë përfunduar pas marjes së njoftimit se trupi i pajetë i Çollakut është gjendur i pajetë në një fshat në zonën e Fushë-Krujës.

Policia ra në kurth
Ndërsa pengmarrësit udhëtonin drejt Krujës me Gazmend Çollakun, policia ngrinte postblloqe në rrugën Durrës- Tiranë.Kontrolle të shumta iu bënë qytetarëve natën e vrasjes, por pa asnjë rezultat.

Policia kishte rënë pre e një loje që organizuan 4 pengmarrësit. Siç u mësua më pas, ata udhëtuan deri në Murqin të Krujës. Aty nxorrën Çollakun nga makina dhe e qëlluan katër herë për vdekje pasi e kishin rrahur dhunshëm me shkop bejsbolli. Dy ditë më parë, policia gjeti në Maminas celularin e Gazmend Çollakut. Loja e vrasësve u kuptua, por ishte shumë vonë. Lidhur me këtë ngjarje policia dhe Prokuroria e Krimeve të Rënda ka ngritur disa pista hetimore. Kryesorja se ekzekutimi është bërë për faktin se Çollaku e dinte kush i vrau dy miqtë e tij, Ervin Kodrën dhe Endri Çaushaj. Për këtë, ai kishte nisur të bashkëpunonte me policinë.
 
Vrasje me mllef
Lufta mes anëtarëve të bandave në Durrës me qëllim kapjen e monopolit të trafikut të drogës, ka sjellë vrasjen makabre të Gazmend Çollakut. 40-vjeçari i vrarë një javë më parë ka pasur njohje me dy viktimën Ervin Kodra, të ekzekutuar në qëndër të Durrësit me 27 plumba kallashnikovi. Sektori i Krimeve të Rënda dhe Prokuroria e Krimeve të Rënda është duke hetuar të kaluar e dy viktimave, pasi nga nformacionet operative të mbëritura nga policia e Durrësit, rezulton se dy viktimat kishin njohje me njëri-tjetrin dhe ishin të skeduar si kontigjent në trafikun e drogës. Për anëtarët e grupit hetimor tani për tani vrasja e Kodrës dhe shokut të tij nga Vlora, Endrit Çaushaj ngre dyshime të forta se mund të ketë shërbyer si indicie për t’u hakmarë ndaj Gazmend Çollakut.

Sipas burimeve vrasje e këtij të fundit ka qënë përtej hakmarrjes pasi është kryer me mllef. Një konkluzjon i tillë ka ardhur nga ekspertët kriminalistë, të cilët gjatë ekspertizës mjeko-ligjore të viktimës kanë konstatuar se koka e Gazmend Çollakut ishte e shtypur. Sipas burimeve, viktima pasi është marrë forcërisht nga ambjentet e lokalit ku qëndronte në Durrës është keqtrajtuar me sende të forta si shkopinj bejsbolli. Këto goditje ai i ka marrë në pjesë të ndryshme të trupit, ku kishte pësuar shtypjen e kokës, thyerjen e një krahu dhe plagë të shumta në trup.

Policia: Përgjoni dhjetra numra telefonikë
Lidhur me këtë ngjarje policia e Durrësit ka referuar në prokurorinë e Krimeve të Rënda një material, duke kërkuar rregjistrimin e hetimeve për akuzën e rrëmbimit, torturimit dhe më pas vrasjen e shtetasit Gazmend Çollakut. Nga ana e policisë janë kërkuar vënia në përgjim e dhjetëra numrave telefonikë, ku mendohet se përdoruesit e tyre mund të kenë dijeni për vrasjen ose të kenë kisht në vrasjen e shtetasit Gazmend Çollaku. Nga ana e policisë po hetohet se krimi ka lidhje me çështjen e trafikut të lëndëve narkotike brenda dhe jashtë vendit.
 
Vrasja e Çollakut Shullasi shoqërohet në polici
Vrasja mafioze e Gazmend Çollakut ka mobilizuar Policinë e Shtetit, duke kryer një sërë kontrollesh në banesat e disa prej emrave më të njohur të krimit në vend. Në total janë shoqëruar rreth 70 persona, në Tiranë, Durrës dhe Fushë-Krujë, por asnjëri prej tyre nuk është ndaluar, pasi për momentin policia nuk disponon prova për të ngritur akuza ndaj tyre. Gjatë natës së të enjtes, Forcat e FNSH kanë kryer kontrolle në banesën e Emiljano Shullazit dhe Plarent Dervishaj, kunati i Lulzim Berishës.

 

TAG:
• Plarent Dervishaj