Hetimi, Clinton i kërkon
FBI të sqarojë amerikanët

Ndërsa na ndajnë vetëm 10 ditë nga zgjedhjet presidenciale telashet për Hillary Clinton nuk kanë të sosur.
 
Kandidatja demokrate Hillary Clinton shprehet e bindur se hetimi i FBI lidhur me emailet e saj nuk do të ndryshojë asgjë dhe se ajo nuk do të ndiqet penalisht sikurse ndodhi me hetimin e parë.
 
Ish-sekretarja e shtetit kërkoi që drejtori i FBI tu shpjegojë amerikanëve hetimin e ri. Clinton u shpreh vetëm pak orë pasi FBI deklaroi se do të nisë hetimet për emailet gjatë kohës kur kandidatja ishte sekretare shteti.
 
“Amerikanët duhet të kenë fakte të plota e madje menjëherë” u shpreh Clinton. Ajo nënvizoi se drejtori i FBI Comey tha se ai nuk e di kuptimin e emaileve të reja.
 
Korrespondencat elektronike dolën në dritë gjatë një hetimi që kishte në qendër ish-bashkëshortin e këshilltares së Clinton-it, Huma Abedin, ish-kongresmenin Anthony Weiner.
 
Pajisje që i përkisnin çiftit ishin konfiskuar si pjesë e dyshimeve, se burri i kishte dërguar email-e me përmbajtje seksuale një 15-vjeçareje.
 
Sipas Comey, është zbuluar ekzistenca e emaile-ve të tjera të rëndësishme dhe kësisoj ishte e nevojshme rinisja e hetimeve për të verifikuar nëse ato përmbajnë informacionet “top secret”.

Ndërsa rivali Trump e cilësoi hetimin e FBI si skandalin më të madh që nga koha Watergate, referuar skandalit të vitit 1970 ku u përfshi presidenti republikan Nikson. Rihapja e hetimeve për Clinton vjen vetëm 10 ditë përpara se në SHBA të mbahen zgjedhjet presidenciale.

Redaksia Online
Al.N/Shqiptarja.com