Hoti: Asociacioni i Komunave Serbe nuk do të bllokojë dialogun me Serbinë

Çështja e Asociacionit të Komunave me shumicë serbe është e mbyllur dhe pala kosovare nuk do të bisedojë në dialogun me Serbinë, u shpreh kështu kryeministri Kosovar Avdullah Hoti.

Pavarësisht se Serbia e ka kushtëzuar dialogun me temën e Asociacionit, në një konferencë për media në Prishtinë,  Hoti theksoi se kjo temë nuk do ta bllokojë procesin e negociatave.

“Unë nuk pres që Asociacioni ta bllokojë procesin e dialogut për shkak se është edhe një dakordim i ndërmjetësit për dialog, që çështja e Asociacionit, marrëveshja për Asociacionin është temë e mbyllur”, tha Hoti.

Ai shtoi se nëse procesi i dialogut bllokohet, kjo nuk do të ndodhë për fajin e Kosovës, pasi sipas tij Kosova ka treguar përkushtim , në veçanti kabineti i drejtuar nga ai.

I pyetur nga mediat për ndryshimet kushtetuese në Kosovë dhe Serbi, për të cilat ka folur i dërguari i posaçëm i BE-së për dialogun, Mirosllav Lajçak gjatë qëndrimit të tij në Serbi.

“Kushtetuta është prekur më 2013, kur është ratifikuar kjo marrëveshje.  Është marrëveshje ndërkombëtare që është ratifikuar me 2/3 e votave të deputetëve të Kosovës”,  tha Hoti.

Lajçak, gjatë qëndrimit në Prishtinë javën e kaluar, tha se Kosova e ka marrë obligim themelimin e Asociacionit me marrëveshjen e 2013-së dhe ajo duhet ta zbatojë marrëveshjen për Asociacionin pas arritjes së marrëveshjes përfundimtare me Serbinë.

Kosova dhe Serbia, më 2013, kanë arritur marrëveshjen e parë, me të cilën parashihej edhe themelimi i Asociacionit të komunave me shumicë serbe. Më 2015, dy palët kanë arritur një marrëveshje të dytë lidhur me parimet e themelimit të këtij Asociacioni, të cilën e ka hedhur poshtë Gjykata Kushtetuese e Kosovës pasi parimet për të nuk janë në përputhje me Kushtetutën e vendit.

TAG:
• kosova
• kosova
• kosova
• kosova
• serbia
• Dialogu Kosovë Serbi