Humbja me Besiktas, Orges Shehi: Keqardhje për golin e tretë, kemi shpresa në Tiranë

Tirana humbi 3-1 me Besiktas në Turqi, në ndeshjen e parë të turit të II kualifikues në Conference League. Pas ndeshjes trajneri bardheblu, Orges Shehi është shprehur i keqardhur për golin e tretë të pësuar, ndërsa shprehet se së ndeshjen e kthimit në "Air Albania" të enjten që vjen do tentojnë mrekullinë.

-A mund të merrte diçka më tepër Tirana sot?

E mira s’ka fund, por jemi të kënaqur me atë që dhamë edhe pse ka disa gjëra që mund t’i bënim më mirë. Ndryshuam vendosje për të mos i dhënë gjerësi kundërshtarit pasi aty po vuanim dhe mendoj se ishim më të ekuilibruar më pas. Jam i kënaqur deri diku.

-A është Besiktasi një skuadër e pakalueshme?

Ne jemi koshient për forcën e kundërshtarit. Pas një ndeshje të parë dhe një informacioni të saktë, kemi një ide më të qartë sesi të vendosemi dhe të interpretojmë ndeshjen e kthimit.

-Mund të evitohej goli i 3-të?

Pjesën e parë kundërshtari ishte në zotërim të topit, morëm 2 gola në tranzicion dhe goli i tretë po i njëjtë. Ishin të evitueshëm për mënyrën si erdhën. Goli i tretë ishte mundësia për ta evituar komplet.

-Ju vjen keq për rastin e humbur nga Abazaj?

Kristali është lojtar i shpejtë dhe ne futëm dy sulmues më pas me Florentin që kërkonte thellësinë. E bëri mirë. Futbolli ka raste të shënuara dhe të humbura, por patjetër do të ishte më mirë 2-1 sesa 3-1.

-Nëse do të përfundonte 2-1 do të kishte shpresa për mrekullinë?

Shpresa kemi edhe me 3-1, por 2-1 do të ishte më e madhe. Më vjen keq sesi u pësua goli në minutën e fundit.

S.Dh/E.H/Shqiptarja.com

TAG:
• conference league
• tirana
• Besiktas
• orges shehi