Në Gjykatën e Posaçme Antikorrupsion (GJKKO) u mbajt sot seanca e parë paraprake ndaj ish-kryetarit të bashkisë së Kavajës Elvis Roshi, të akuzuar nga SPAK për shpërdorim detyre.

Avokati Andi Skënderi tha se vepra është parashkruar pasi akuza ngrihet mbi një kallëzim të KLSH-së 10 vite më parë sipas të cilit Roshi dhe disa zyrtarë të kohës në bashki dyshohet se kanë skualifikuar operatorin me ofertën më të ulët, në 12 tenderë kryesisht për rikonstruksionin e qendrës së qytetit, të disa rrugëve lidhëse dhe mbjelljen e pemëve dekorative.

Dëmi ekonomik përllogaritet në 33 milionë lekë. Avokati i Roshit i kërkoi shpjegim pse akuza ndryshoi nga ‘shkelje e barazisë në tenderë” në “shpërdorim detyre”, ndërsa SPAK kërkoi kohë duke e shtyrë seancën më 3 prill.

Hetimi ndaj ish-kryebashkiakut erdhi pas një kallëzimi të bërë nga Kontrolli i Lartë i Shtetit për parregullsi në tendera gjatë periudhës së tij në krye të Bashkisë së Kavajës.

Roshi u kallëzua 10 vite më parë në Prokurorinë e Kavajës nga KLSH në shtator të vitit 2015, ku Rroshi dhe 10 zyrtarë të tjerë dyshoheshin se kishin shkaktuar një dëm ekonomik prej 33 milionë lekësh me tenderat e rikonstruksionit të qendrës së qytetit dhe ndërtimin e disa rrugëve.

Shkeljet u zbuluan pas një auditi të kryer në Bashkinë e Kavajës për periudhën janar 2013-dhjetor 2014. Në listën e shkeljeve u renditën 12 tendera, të zhvilluar kryesisht për rikonstruksionin e qendrës së qytetit, të disa rrugëve lidhëse dhe mbjelljen e pemëve dekorative. Në dy raste, KLSH e akuzoi Bashkinë e Kavajës se ka ndjekur standard të dyfishtë në vlerësimin e pjesmarrësve në tenderë, duke skualifikuar operatorin me ofertën më të ulët.

Për 3 tenderë të tjerë, u konstatua se ofertuesi me çmimin më të ulët është skualifikuar padrejtësisht si rezultat i llogaritjes së gabuar të ofertës. Çështja shkoi më pas në Prokurorinë e Durrësit e cila kërkoi ta mbyllte, por një vendim i GJKKO vitin e kaluar urdhëroi hetimin e dosjes nga SPAK.

Më 17 maj 2025, SPAK i sekuestroi celularin Roshit dhe ushtroi kontrolle personale nën dyshimin për korrupsion në zgjedhjet e 11 majit, teksa bënte fushatë për kushëririn e tij Elton Roshi në Kavajë, që kandidonte për PD-ADSHM-në e Sali Berishës.

-------------------------------

Sqarim: Çdo person prezumohet i pafajshëm deri sa nuk vërtetohet fajësia e tij me vendim gjyqësor të formës së prerë