Ilir, me çfarë parash qëndroni ju dhe stafi juaj në Vlorë?

Ilir Meta, që mban pozicionin e Presidentit të Republikës, ka deklaruar edhe mbrëmë në një studio televizive, siç kishte bërë disa herë më parë në daljet e tij se ai do të vazhdojë të qëndrojë larg zyrës së tij në Tiranë, por do të vazhdojë të bëjë fushatë në Vlorë.

Është e dukshme që Ilir Metën e kanë shqetësuar shumë sondazhet dhe terreni që tregojnë se LSI po shkon pikiatë, ndaj edhe ka vendosur të dalë në fushëbetejë vetë duke braktisur detyrën e Presidentit. Por, kjo histori është një fakt i gjithëditur nga çdo shqiptar, pavarësisht përgënjeshtrimit apo justifikimit qesharak që përdor Meta për këtë skandal e çmenduri të radhës.

Përtej kësaj çmendurie që Ilir Meta bën duke dalë në fushatë kur duhet të jetë mbi palët dhe simbol i Unitetit Kombëtar në cilësinë e Presidentit, ka edhe disa pyetje të cilave Ilir Meta nuk i është përgjigjur akoma. Më çfarë parash qëndron Ilir Meta në Vlorë? Me çfarë parash paguhet karburanti, me çfarë makinash udhëton? Po stafi i tij që merr rrogën në Presidencë, paguhet për të qëndruar në Vlorë në fushatën e shefit apo në institucion?

Përgjigjet mund të jenë dy: E para, janë paratë publike që Ilir Meta i përdor për të bërë fushatë për LSI-në në Vlorë, bashkë me stafin e Presidencës që paguhen nga taksat tona dhe bëjnë fushatë për bashkëshorten e shefit dhe e dyta, paratë të padeklaruara që janë ‘donacione’ nga persona të paidentifikuar.

Në të dyja rastet, Ilir Meta është me të dyja këmbët në shkelje. E mjafton vetëm kjo për të thënë se Ilir Meta është i fundit që mund të flasë për ndershmërinë, zbatimin e ligjit apo shfrytëzimin e resurseve shtetërore për fushatë elektorale.

K.T./Shqiptarja.com

TAG:
• Presidenca
• Vlore
• Ilir Meta
• zgjedhjet parlamentare 2021