Një investim 3.5 miliard lekë i financuar nga Qeveria shqiptare do t'i vijë në ndihmë më shumë se 15 mijë banorëve në Labinot Mal në Elbasan.

Puna për rikonstruksionin e rrugës Elbasan-Labinot Mal, 16 km, ka nisur dhe të pranishëm për inspektim kanë qenë edhe kryetari  Grupit Parlamentar të Partisë Socialiste, Taulant Balla dhe kryetari i Bashkisë Elbasan Gledian Llatja.

Balla u shpreh se kjo rrugë u shërben disa mijëra banorëve të kësaj zone, një nga njësitë më të mëdha administrative të Elbasanit.

"Qëllimi ynë është ta rivitalizojmë këtë zonë, t’i japim zhvillimin e nevojshëm edhe përsa i përket agroturizmit”, vijoi ai.

Për kryebashkiakun Llatja, ky është një premtim i mbajtur i qeverisë shqiptare që u vjen në ndihmë më shumë se 15 mijë banorëve.