Isa Mustafa probleme me shëndetin
shtrohet në spital privat në Prishtinë

Ish- kryeministri i Kosovës dhe kreu i LDK-së, Isa Mustafa, është shtruar në spital. Mediat në Prishtinë thonë se ai ka pasur disa probleme shëndetësore gjatë ditëve të fundit.

Zyrtarë të një spital privat në Prishtinë kanë Isa Mustafa është duke u trajtuar në spital me terapi nga një gjendje gripale, por gjendja e tij paraqitet stabile. Në spital do të qëndrojë deri në përmirësimin e gjendjes. "Ai është duke u trajtuar në spital me terapi. Gjendja e tij është stabile. Në spital do të qëndrojë deri në përmirësimin e gjendjes", janë shprehur zyrtarë të Spitalit.

Isa Mustafa u lind më 15 maj 1951 në Prapashticë, Komuna e Prishtinës. Është i martuar, ka një vajzë dhe dy djem. Jeton në Prishtinë, ku ka kryer shkollimin fillor, atë të mesëm dhe Fakultetin Ekonomik. Është zgjedhur kryetar i Komunës së Prishtinës, në dhjetor të vitit 2007 dhe në nëntor të vitit 2009.

Punën dhe ekspertizën profesionale e ka filluar në vitin 1974, në Universitetin e Prishtinës. Ndërkohë ka qenë edhe kryetar i Qeverisë Komunale të Prishtinës (1984-1988), drejtor i Entit për Plan dhe Zhvillim të Kosovës dhe Ministër i Ekonomisë dhe Financave të Republikës së Kosovës (1991-1999).

Në nëntor të vitit 2010 është zgjedhur kryetar i Lidhjes Demokratike të Kosovës. Ai është anëtar i rregullt i Akademisë së Shkencave dhe Arteve të Kosovës. Mustaf ishte zgjedhur edhe kryeministër i Kosovës në vitin 2014./Ekspress/

l.q/Shqiptarja.com