Fatos Nano u paraqit në spital më datë 8 tetor, ndërsa gjendja e tij shëndetësore, prej kohësh mjaft delikate, mori një kthesë të rrezikshme pas një arresti kardiorespirator. Situata nuk shënoi ndonjë përmirësim.

Gjatë ditës së sotme ai mori një tjetër goditje. Burime nga spitali bëjnë të ditur se ai kaloi dhe një arrest kardiak, duke bërë që gjendja të përkeqësohet akom më shumë.

Mësohet se zoti Nano nuk reagon më, dhe nuk është koshient. Ai po mbahet në jetë përmes aparaturave, dhe i intubuar.

Lideri historik i PS-së, prej kohësh ka patur probleme me mushkërinë. Ai është shtruar disa herë në spital për shkak të një shqetësimi kronik respirator, që njihet edhe si SPOK, sëmundje pulmonare obstruktive kronike.

Fatos Nano, 73 vjeç është themeluesi dhe kreu i parë i Partisë Socialiste të Shqipërisë. Ai ishte njeriu që bëri të mundur transformimin e ish Partisë së punës që vinte nga trashëgimia komuniste, në një forcë që i rezistoi pluralizmit politik, si një aktore me peshë në skenën shqiptare.

Nano ka qenë kryetar i Partisë Socialiste nga 12 qershori i vitit 1991 e deri në vitin 2005, kohë kur u shkëput nga politika. Një përpjekje e tij e mëvonshme për postin e kreut të shtetit, nuk u mbështet nga Partia socialiste, drejtimin e së cilës e kishte marrë Edi Rama. Gjatë viteve të angazhimit në politikë, që nga viti 1991, ai shërbeu 4 herë si kryeministër i vendit.