Ish-ministri i Mbrojtjes i Ukrainës, Mykhailo Fedorov, i cili u shkarkua së fundmi, ka bërë thirrje për zhvillimin e zgjedhjeve presidenciale gjatë kohës së luftës, duke sfiduar drejtpërdrejt Volodymyr Zelenskyn.

Politikani, shkarkimi i papritur i të cilit muajin e kaluar shkaktoi një valë protestash, tha se Ukraina duhej të “rikthente një proces të plotë demokratik edhe në kushtet e një lufte të zgjatur”, në një video-mesazh të publikuar online vonë të martën në mbrëmje.

“Demokracia nuk mund të mbahet peng nga Rusia. Ne po luftojmë pikërisht sepse duam të mbetemi një shtet i lirë evropian”, tha Fedorov në fjalimin e tij nëntëminutësh.

Edhe pse nuk e përmendi Zelenskyyn me emër, Fedorov la të kuptohej se presidenti aktual drejtonte një shtet që nuk funksiononte mirë dhe që po përballej me vështirësi në luftën kundër korrupsionit, pavarësisht gjendjes së jashtëzakonshme në vend.

“Populli nuk mund të jetojë pafundësisht në një gjendje ku nuk e kupton pse merren vendime të caktuara. Pse disa reforma ecin përpara, ndërsa të tjerat bllokohen”, tha Fedorov, duke argumentuar se Ukraina mund të zhvillojë luftën dhe njëkohësisht të mbajë zgjedhje kombëtare.

“Është shumë e rrezikshme kur shoqëria krijon ndjesinë se kriteri kryesor për një emërim nuk është profesionalizmi, rezultatet apo aftësia për të transformuar vendin, por besnikëria personale ndaj sistemit”, tha ai.

Zgjedhjet janë pezulluar në Ukrainë që nga vendosja e ligjit ushtarak në fillim të pushtimit në shkallë të gjerë nga Rusia. Mandati pesëvjeçar i Zelenskyyt përfundoi në maj të vitit 2024, por në Ukrainë ka pasur pak dëshirë për zhvillimin e zgjedhjeve për sa kohë që lufta vazhdon.

Presidenti i SHBA-ve, Donald Trump, ka kërkuar më parë që Ukraina të zhvillojë zgjedhje, megjithëse marrëdhënia e tij dikur e tensionuar me Zelenskyn është përmirësuar gradualisht gjatë vitit të kaluar, ndërsa Kievi ka treguar se është në gjendje të përballojë situatën në fushëbetejë.

Fedorov, 35 vjeç, ishte ministër i Transformimit Digjital të Ukrainës nga viti 2019 deri në janar për përdorimin e dronëve gjatë luftës, përpara se të shërbente për një periudhë të shkurtër si ministër i Mbrojtjes, një detyrë që u konsiderua e suksesshme deri në korrik.

Por ai u shkarkuar papritur nga detyra prej Zelenskyt gjatë një riformatimi të qeverisë, pas një përplasjeje me komandantin e ushtrisë, gjeneralin Oleksandr Syrskyi. Pasuan protesta në rrugë, të cilat çuan në shkarkimin e Syrskyit, por nuk pati asnjë shenjë se Fedorov do të rikthehej në detyrë.

Të martën, Zelensky emëroi zyrtarisht Yevhen Khmaran, që deri në këtë moment shërbente si ministër në detyrë për Mbrojtjen. Emërimi i Khmaras duhet të miratohet nga parlamenti i Ukrainës dhe votimi pritet të zhvillohet sot.