Ish-Presidenti Trump kërkesë Gjykatës së Lartë t’ua ndalojë ligjvënësve të marrin deklaratat e tij të taksave

Ish-Presidenti Donald Trump i kërkoi të hënën Gjykatës së Lartë të ndërhyjë për të parandaluar që një komision i Dhomës së Përfaqësuesve të ketë qasje tek deklaratat e tij të taksave për arsye që ai thotë se janë të motivuara politikisht.

Ish-Presidenti Trump paraqiti kërkesën për pezullimin e vendimit të një gjykate të nivelit më të ulët, e cila vendosi të mbështesë kërkesën e komisionit të Dhomës së Përfaqësuesve që mbikqyr të ardhurat (Way and Means Committee), për të marrë deklaratat e tij të taksave, në kuadrin e punës legjislative ndërkohë që avokatët e ish-presidentit mund të përgatisnin apelimin.

“Nëse lejohet të qëndrojë, (vendimi) do të dëmtojë ndarjen e pushteteve dhe do ta ekspozojë zyrën e Presidentit ndaj kërkesave ndërhyrëse për informacion nga kundërshtarët politikë në degën legjislative”, shkruajtën avokatët e ish-Presidentit Trump, duke iu referuar ndarjes së autoritetit mes tre degëve të sistemit të qeverisjes në Shtetet e Bashkuara.

Kjo betejë vazhdon që nga viti 2019, kur ky komision bëri padi gjyqësore ndaj zotit Trump për ta detyruar atë të jepte deklaratat e taksave. Ish-Presidenti Trump ishte presidenti i parë në katër dekada që nuk bëri publike deklaratat e tij të taksave dhe u përpoq të mbajë sekret detajet e pasurisë së tij dhe aktivitetet e kompanisë së tij, Organizata Trump.

Për kërkesën e tij, komisioni u bazua tek një ligj federal që autorizon kryetarin e këtij komisioni të kërkojë deklaratat e taksave të çdo personi nga agjensia e taksave IRS.

Ligjvënësit demokratë kanë thënë se duhet të marrin deklaratat e taksave të ish-Presidentit Trump për të parë nëse IRS-ja po shqyrton në mënyrën e duhur taksat e deklaruara nga presidentët dhe për të parë nëse nevojitet legjislacion i ri. Avokatët e ish-Presidentit Trump e kanë quajtur këtë shpjegim një “pretekst” dhe “të pandershëm”, dhe thonë se qëllimi i vërtetë është nxjerrja e informacionit të dëmshëm politikisht për zotin Trump, i cili po shqyrton mundësinë e një rikandidimi për president në vitin 2024.

Gjykatësi Trevor McFadden, i emëruar nga vetë ish-Presidenti Trump, nuk e pranoi kërkesën në dhjetor 2021 dhe vendosi se komisioni ka autoritet të gjerë mbi deklaratat e taksave të presidentëve.

Në gusht, edhe Gjykata e Apelit në Distriktin e Kolumbias vendosi kundër zotit Trump, duke konkluduar se “çdo president e merr detyrën duke ditur se kur të jetë larguar nga posti do t’i nënshtrohet të njëjtat ligjeve si të gjithë qytetarët e tjerë”. Gjykata vendosi kundër mbajtjes së një seance dëgjimore më 27 tetor.

M.Q./Shqiptarja.com

TAG:
• donald trump
• SHBA