Mbi 30 plumba janë qëlluar mbrëmjen e së shtunës drejt një makine të parkuar në oborrin e një shtëpie në Urakë të Matit.

Nga të shtënat, ‘Audi’ ka pësuar dëme materiale, ndërsa nuk pati asnjë të plagosur apo viktimë.

Por ndërsa policia kontrollonte zonën, 2 kilometra më tutje, në aksin Rrëshen-Burrel, gjeti një ‘Golf V’ të djegur që dyshohet se u përket autorëve. Brenda kishte dy kallashnikovë, pjesërisht të dëmtuar nga flakët, tashmë të sekuestruar.

Automjeti ishte raportuar i vjedhur më 31 korrik të vitit të shkuar, nga një banor i Përrenjasit.

Policia vijon hetimet për zbardhjen e rrethanave të ngjarjes.

Njoftimi i plotë:

Më datë 12.09.2026, rreth orës 23:10, në fshatin Urakë, Njësia Administrative Rukaj, Bashkia Mat, nga persona ende të paidentifikuar është qëlluar me armë zjarri në drejtim të automjetit tip “Audi”, në pronësi të shtetases S. Ll. (bashkëshortja e shtetasit A. Ll.), i parkuar në oborrin e banesës.

Nga të shtënat janë shkaktuar dëmtime materiale vetëm në automjetin tip “Audi”.

Shërbimet e Policisë, me marrjen e njoftimit, shkuan menjëherë në vendngjarje dhe, në bashkëpunim me DVP Dibër, ngritën pika kontrolli.

Ndërkohë, në vendngjarje shkoi grupi hetimor.

Shërbimet e Policisë, gjatë kontrollit të territorit, rreth 2 kilometra larg nga vendi i ngjarjes, në aksin rrugor Rrëshen-Burrel, kanë konstatuar të djegur një automjet tip “Golf V”. Gjatë këqyrjes së automjetit, në brendësi të tij janë gjetur dy armë zjarri kallashnikov, të djegura pjesërisht, të cilat u sekuestruan në cilësinë e provës materiale.

Nga verifikimet e kryera rezulton se automjeti tip “Golf”, i konstatuar i djegur, ishte shpallur në kërkim nga DVP Elbasan më datë 31.07.2025, pasi kishte bërë kallëzim pronari i tij, shtetasi K. R., banues në Përrenjas, se i kishin vjedhur këtë automjet.

Shërbimet e Policisë po vijojnë kontrollet në zonën ku mund të kenë lëvizur autorët e dyshuar dhe po bashkëpunohet me DVP Tiranë, Lezhë e Kukës.

Grupi hetimor, nën drejtimin e Prokurorisë, vijon intensivisht veprimet me qëllim zbardhjen e rrethanave, sigurimin e provave që do të çojnë në identifikimin dhe kapjen e autorëve.