Ishte më i votuari i PD në Shkodër, por s'e mori mandatin, Spahia: E keqja fitoi një betejë, por lufta vazhdon

Edhe pse ishte kandidati më i votuar i PD në Shkodër, Bardh Spahia i renditur i 7 në listë nuk arriti që ta thyejë dot herësin duke mos marrë kështu një mandat për të hyrë në Kuvend.

Ai mori 7219 vota preferenciale dhe me anë të një postimi në rrjete sociale ka bërë një falenderim për të gjithë ata që e mbështetën në garën e 25 prillit.

"Mirenjohje dhe respekt! Në pamundësi për t'ju falënderuar fizikisht secilin nga ju, dua t'ju shpreh mirënjohjen time me zemër për mbështetjen e pakursyer, që më dhatë në garën e 25 Prillit. Ajo mbështetje, që e kam ndjerë në vazhdimësi ndër vite kudo, që nga njerëz të njohur e panjohur në rrugët e qytetit tim, tek komshinjtë në lagjen time ku u rrita, tek të rinjtë e të rejat e deri tek miqtë e shumtë në rrjete sociale, është përgjegjësi dhe motivimi im për të qenë zëri juaj i pakompromis, në emër të Partisë Demokratike, në Kuvendin e Shqipërisë.

LEXO EDHE:
Vau i Dejës/ Dyshohet se qëlloi me pistoletë drejt një makine, në kërkim 35-vjeçari

Mirënjohje për ekipin energjik e të motivuar, që punoi me mua ditë pas dite e pa orar, për të përcjellë projektin tonë të ndryshimit për Shqipërinë. Kam marrë mbështetje, por edhe kam mësuar shumë prej të rinjve të talentuar të qarkut tonë, njohje të hershme apo të reja, të kthyera tashmë në miqësi që do vijojë të forcohet. Zhvilluam një betejë, të cilën e kishim fort për zemër, e të cilës i dhamë gjithë energjinë, përvojën, përkushtimin, por sidomos pasionin për të bërë më të mirën për Shkodrën tonë.

Falenderime nga zemra edhe për miqtë, kolegët mjekë, personalitete të fushave të ndryshme, e të njohurit e shumtë brenda e jashtë vendit, që edhe duke mos qenë banorë të Shkodrës, më inkurajonin me vëmendjen e tyre sistematike gjatë kësaj fushate. Falenderime për familjen time, që më ka mbështetur pa kushte dhe me pasionin, përkushtimin dhe besimin e palëkundur në vlerat dhe aspiratat e Partisë Demokratike, të trashëguar nga një traditë e gjatë, e qëndrueshme dhe e pandryshueshme".

Spahia ndër të tjera thotë se e keqja fitoi betejën, por lufta e opozitës vazhdon ende. Pavarësisht se nuk do të jetë në Kuvend, Spahia thotë se do të jetë gjithmonë pranë Shkodrës e Shqipërisë.

"Falënderoj gjithashtu komisionerët, vëzhguesit, numëruesit dhe përfaqësuesit e PD, për impenjimin e tyre të jashtëzakonshëm gjatë këtyre ditëve e netëve të lodhshme. U jam pafundësisht mirënjohës! E keqja fitoi një betejë, por lufta vazhdon! Unë do të jem gjithmonë aty për Shkodrën tonë, për Shqipërinë", shton ai.

TAG:
• Shkoder
• PD
• Bardh Spahia
• zgjedhjet parlamentare 2021