Itali/ Punonte në një serë dhe sa ishte bashkuar me familjen, i riu shqiptar gjendet i pa jetë në arë

Një 20-vjeçar shqiptar në Itali është gjendur i pa jetë në një arë në afërsi të një sere ku ishte i punësuar.

Mediat italiane raportojnë se i riu, vetëm pak kohë më parë ishte bashkuar me familjen e tij, e cila kishte vite që jetonte në Sparanise, në Agro Caleno dhe nuk kishte shumë kohë që kishte gjetur punë në këtë serë.

Dyshimet e para për vdekjen e papritur të tij, lidhen me temperaturat e larta, por priten rezultatet e autopsisë.

I riu shqiptar është identifikuar si A.D, nga një fshat i Cërrikut. Fillimisht raportohet se ai ka pasur probleme me frymëmarrjen dhe i ka thënë të atit se nuk ndjehet mirë dhe që i mbahet fryma.

I riu ka dalë jashtë serës për tu ajrosur, madje ka ndezur kondicionerin e makinës për tu freskuar. Dyshohet se i ndjeri ka pirë edhe ujë shumë të ftohtë çka mund të ketë sjellë ndryshim të menjëhershëm të temperaturës që mund të ketë ndikuar në përkeqësimin e gjendjes së tij shëndetësore.

Kur familjarët kanë shkuar pranë tij, pasi ishte vonuar, e kanë gjetur të vdekur, ndërkohë, policia ka nisur një hetim.

S.C/Shqiptarja.com

TAG:
• itali
• shqiptaret