Janina, si tjetërsoi pasuritë tek
çifti Leka me çmime fiktive

Mbërritja e dosjes penale, nga Spanja në policinë dhe prokurorinë Shqiptare, duket se nuk ka surprizuar biznesmenin e njohur të hidrosanitareve Nikolin Janina.

Dikush ka informuar këtë të fundit për veprimet ligjore që kishin marë institucionet e hetimit, dhe për pasojë biznesmeni ka filluar të tjetërsojë tek persona të tretë pasuritë e tij, si dhe një pjesë të këtyre pasurive i ka shituar. Edhe verifikimet e kryera në llogaritë bankare të biznesmenit, bashkëshortes së tij dhe dy personave të tjerë, prokuroria ka konstatuar shifra shumë të ulta të parave dhe eurove të depozituara në bankë.

Nga të dhënat e administruara nga “Shqiptarja.com” rezulton se Nikolin Janina ka pasuri të paluajtshme në vlera të konsiderueshme, të cilat pavarësisht dy bizneseve të tij, referuar dhe shumës së një kredie prej 1.975.140 euro të shlyer në 13 mars 2016, dyshohet se janë vënë si rezultat i përfshirjes së tij në aktivitet kriminal, në fushën e narkotrafiqeve në Spanjë.

Gjithashtu dyshohet se një pjesë e kontratave të Shit-Blerjes së tokave në Himarë dhe Dhërmi janë fiktive, pasi vlerat reale të këtyre pasurive dyshohet se janë disa herë më të mëdha se sa ajo e shënuar në kontrata. Nga një vëzhgim i bilancit kontabël të kompanisë më të mëdhë “Alba Ceramika” që biznesmeni Janina administron, rezulton se fitimi i kësaj kompanie për vitin 2016 ka qënë 52 milion lekë të vjetra.

Kjo shifër sipas prokurorisë është e pamundur të justifikojë pasurinë që zotëron Janina, dhe për pasojë janë krijuar dyshime të arsyeshme ndaj tij.

Ndër të tjera Nikolin Janina ka filluar të tjetërsojë disa pasuri të tij pas momentit të rregjistrimit të proçedimit penal nga ana e Prokurorisë së Krimeve të Rënda. Më konkretisht ai ka tjetërsuar një pasuri në favor të personave të tretë në datën 10 prill 2017 në emër të shtetasve Gerdi dhe Ledi Leka.

Mësohet se po në 10 prill një tjetër pasuri në emër të Nikolin Janinës i është transferuar në 10 prill 2017 dy shtetasve të sipërcituar. Pasuritë janë tjetërsuar vetëm dy muaj pasi Prokuroria e Krimeve të Rënda kishte nisur hetimin penal kundër biznesmenit Janina. Nga prokuroria mësohet se biznesmeni dy pasuri të tjera i ka tjetërsuar në muajin dhjetor të 2016.

Ndërkohë një kompani farmaceutike e quajtur “RX:PHARMA” që deri në 27 maj 2015 ka qënë në pronësi të kryebashkiakut të Vlorës Dritan Leli, dhe më pas është shitur tek Ledia Çikopana dhe kjo e fundit shitjen e ka realizuar tek Nikolin Janina, është shitur prej këtij të fundit në 15 prill 2016 tek shtetësja Maris Tartari.

Shitjet e kompanive, kanë filluar menjëherë pasi emri i tij është targetuar nga Spanjollët në listën e personave në kërkim. Kjo shitje është realizuar pikërisht ditën kur autoritet e drejtësisë spanjolle kanë nxjerë emrin e Nikolin Janinës në listën e personave të kërkuar ndërkombëtarisht.

Kjo kompani është shitur me vlerën prej 1 milion lekë të vjetra. Hetimi 6 mujor i prokurorisë dhe policisë ka hedhur dritë edhe mbi disa kontrata noteriale, që në vlerësimin e prokurorisë janë fiktive. “Shqiptarja.com” zbulon se çuditërisht biznesmeni Janina ka blerë një sipërfaqe toke prej 6666.6 m2 në “Porto Palermo” me vlerë 30 milion lekë të vjetra.

Ndërkohë me një çmim akoma më qesharak e ka blerë një sipërfaqe toke prej 4375 m2 të ndodhur në zonën bregdetare të Dhërmiut-Himarë me një vlerë prej 9 milion e 936 mijë lekë të vjetra. Gjithashtu një sipërfaqe tokësore prej 5000 m2 në vendin e qujatur “Lera” në Himarë e ka blerë kundrejt shumës prej 11 milion lekëve të vjetra.

Janina ka vijuar të blerë sipërfaqe tokësore me çmime qesharake në bregdet, ku në zonën e quajtur “Amallol” në Himarë ka blerë një sipërfaqe toke prej 2000 m2 me vlerën prej 4 milion lekë të vjetra. Një muaj pas kësaj blerje, biznesmeni i hidrokarbureve në shtator të 2013 ka blerë një sipërfaqe toke prej 10.000 m2 në Dhërmi me vlerën prej 22.7 milion lekë të vjetra. Të gjitha këto kontrata sipas prokurorsisë ka dyshime se janë fiktive, pasi çmimi i pasqyruar në këtë kontrata nuk tregon vlerën financiare të këtyre pronave.





Redaksia Online
l.q/Shqiptarja.com