Jashtë Champions-it/ Gattuso jep dorëheqjen: Duhet të largohesha

Mbetja jashtë zonës së Ligës së Kampionëve edhe për një sezon, ka detyruar trajnerin e Milanit që të largohet. Siç shkruan, mediat italiane, Gattuso së bashku me drejtorin sportiv Leonardo, kanë zhvilluar një takim me drejtorin e përgjithshëm, Ivan Gazidis ku kanë paraqitur dorëheqjen. Zyrtarizmi pritet të bëhet ditën e martë.

41-vjeçari ka pasur kontratë deri më 2021, por dështimi për t'u bërë pjesë e ligës më të rëndësishme të klubeve i kushtoi shumë.

"Vendosja për ta lënë stolin e Milanit nuk është e lehtë, por është një vendim, që duhet ta marr. Nuk kishte një moment të saktë, në të cilin e pata peshuar këtë vendim. Ishte shumatorja e këtyre 18 muajve si trajner i një ekipi, që për mua nuk do të jetë kurrë si të tjerët. Këto muaj jetova me pasion të madh, do të jenë muaj të paharrueshëm. A po heq dorë nga një kontratë 2-vjeçare? Po, sepse historia ime me Milanin nuk mund të jetë kurrë një çështje parash", tha Gattuso.

Një nga kandidatët e mundshëm që flitet se do të zëvendësojë Gattuson është trajneri i Lazios, Simone Inzaghi. Ky i fundit po kërkohet edhe nga Juventus, për të zëvendësuar Massimiliano Allegrin Rossonerët përfunduan sezonin në vendin e pestë, një pikë larg Atalanta dhe Inter, që zunë një vend në Champions. Gjatë kohës si trajner i Milanit, italiani mori 40 fitore, 22 barazime dhe 20 humbje.

B.K./Shqiptarja.com

TAG:
• Milan
• genaro gattuso