JEMEN - Një autobombë ka shpërthyer në Ministrinë e Mbrojtjes të Jemenit në kryeqytetin Sanaa duke marrë jetët e 20 personave dhe duke plagosur mbi 37 të tjerë.

Pas shpërthimit, militantë të al-Qaedas kanë hyrë në godinë dhe kanë shkëmbyer zjarr me policinë.

Një burim i ministrisë deklaroi për agjensinë Reuters se sulmi ndodhi pak pasi kishte filluar dita e punës në ministri. Një makinë iu afrua derës kryesore para se shoferi ta hidhte në erë.

Sipas burimit, shpërthimi i fortë tundi të gjithë godinën dhe ngriti në ajër një re të madhe tymi.

Zyrtarët thanë se një makinë e dytë me njerëz të armatosur ndaloi para ministrisë dhe filloi të shkëmbente zjarr me forcat e rendit. 

Jemeni po kalon një tranzicion të dhunshëm që prej largimit me forcë nga pushteti të Presidentit Ali Abdullah Saleh, në vitin 2011.


(v.gj/shqiptarja.com)