​Katër kryetarët e komunave në veri japin dorëheqjen: Serbëve të Kosovës iu është kërcënuar jetesa

Katër kryetarët e komunave të veriut të Kosovës kanë dhënë dorëheqjen nga postet e tyre, duke e mbështetur vendimin e tyre në pohimin se serbëve të Kosovës po iu kërcënohet jetesa nga shkeljet dhe masat drastike të marra së fundmi nga qeveria kosovare.

Kryetari i veriut të Mitrovicës, Goran Rakiq, ai i Leposaviqit, Zoran Todiq, kryetari i Zubin Potokut, Stevan Vuloviq si dhe kryetari i Zveçanit, Vucina Jankoviq kanë qenë ata që kanë ndërprerë komunikimin me institucionet përkatëse.

Sipas medias kosovare “Indeksonline”, katër kryetarët kanë nënshkruar një deklaratë të përbashkët me disa pika, ku kanë paraqitur edhe arsyet për vendimet e tyre.

Katër pikat që kanë çuar katër kryetarët në një vendim të përbashkët, janë:

1. Ngritja e takës në 100 për qind për mallrat serbe, përmes së cilës serbëve të Kosovës u është kërcënuar e drejta për jetesë, për shërim dhe mbijetesë gjë që çon në krizë edhe më të thellë.

2. Dhuna e vazhdueshme, rrahja e serbëve, arrestimet e paligjshme dhe tentimi për të vrarë Millan Radojiçiqin, gjë që po ashtu rrezikon të drejtën për jetesë të serbëve në Kosovë.

3.Shkeljet e të gjitha marrëveshjeve ndërkombëtare, nga Rezoluta 1244, marrëveshjet e Brukselit dhe të CEFTA-s.

4. Shkelja e akteve të veta nga ana e Prishtinës, me të cilat duhet të respektohen të drejtat e serbëve.

Si rrjedhojë e dorëheqjes së tyre, komuna e veriut të Mitrovicës, Leposaviqit, Zubin Potokut dhe Zveçanit pritet tanimë të shkojnë në zgjedhje të parakohshme. Ndërkohë, vlen të theksohet se Komisioni Qendror i Zgjedhjeve (KQZ) ende s’ka pranuar në formë zyrtare dorëheqjet e tyre.

TAG:
• kqz
• taksa per mallrat serbe
• Goran Rakiq
• Zoran Todiq
• Stevan Vuloviq
• Vucina Jankoviq
• dorëheqja e katër kryetarëve të komunave në veri