Katër shqiptarë janë dënuar me burg në Angli, pasi u përfshinë në një seri grabitjesh në banesat e familjeve nga komuniteti i Azisë Jugore në Londër. Sipas mediave britanike, ata kishin shënjestruar qëllimisht këto familje, duke besuar se në banesat e tyre do të gjenin bizhuteri dhe sende me vlerë të lartë. Gjatë grabitjeve u vodhën sende me vlerë mbi 8 mijë paund, mes tyre një orë Rolex me vlerë 7 mijë paund, vathë floriri prej 1,500 paundësh dhe një unazë antike me vlerë 1,200 paund. Hetimet zbuluan se autorët vëzhgonin fillimisht banesat dhe lëvizjet e pronarëve, përpara se të hynin me forcë në to.

Dy prej të dënuarve janë Çlirim Ferizi, 26 vjeç, banues në Harrow, dhe Oresti Saliaj, 40 vjeç, banues në Brent. Ferizi u dënua me dy vite burg, ndërsa Saliaj me tre vite e gjashtë muaj. Hetimet ndaj tyre nisën pas një grabitjeje në Ruislip, në muajin shkurt. Përmes pamjeve të kamerave të sigurisë, provave të ADN-së, të dhënave telefonike dhe kartave të transportit publik Oyster, detektivët arritën t'i lidhnin me disa vjedhje të tjera.

Një prej rasteve ishte grabitja e një banese në Oakleigh Park North, më 30 janar, ku u vodh një orë Rolex dhe sende të tjera me vlerë. Kamerat treguan se autorët e kishin vëzhguar banesën disa orë përpara se të kryenin grabitjen, duke monitoruar lëvizjet e pronares. Më 27 shkurt, ata hynë me forcë në një tjetër banesë në Shenley Avenue, në Ruislip, ndërsa të nesërmen u futën edhe në një banesë në Marsh Road, në Harrow, ku kontrolluan të gjitha dhomat, por nuk arritën të vidhnin asgjë.

Pavarësisht se gjatë grabitjeve kishin përdorur maska për të fshehur identitetin, policia arriti t'i identifikonte përmes gjurmimit të lëvizjeve të tyre. Kartat Oyster rezultuan vendimtare për hetimin, pasi regjistronin oraret dhe itineraret e udhëtimeve të tyre me autobus dhe metro. Madje, hetuesit zbuluan se Ferizi kishte përdorur kartën e tij bankare për të rimbushur kartën Oyster në stacionin e Ruislip, duke siguruar prova të tjera për praninë e tij në zonën ku ishte kryer grabitja. Të dy u arrestuan më 23 mars.

Në një tjetër hetim për grabitje të ngjashme në zonën e Hayes, policia identifikoi edhe dy shqiptarë të tjerë, Dionis Hetaj, 35 vjeç, dhe Arben Cuka, 31 vjeç. Ata kishin kryer një seri vjedhjesh brenda një periudhe tetëditore, duke shënjestruar gjithashtu banesat e familjeve nga komuniteti i Azisë Jugore. Hetaj u kap në çatinë e një banese në Ealing, ku ishte përpjekur t'i shpëtonte policisë. Gjatë arrestimit, atij iu gjet një levë hekuri dhe sende të vjedhura nga banesa. Cuka u lokalizua dhe u arrestua më 4 mars. Të dy u dënuan me një total prej pesë vitesh burg në Gjykatën Mbretërore të Isleworth, më 23 prill.

Ndërkohë, në një hetim të veçantë të njësisë Flying Squad të Policisë Metropolitane, u dënua edhe britaniku Patrick Doherty, 24 vjeç, i cili ishte pjesë e një grupi të organizuar kriminal që grabiste banesa të familjeve nga komuniteti i Azisë Jugore në Londër dhe zonat përreth. Ai u identifikua përmes pamjeve të kamerave të sigurisë, dëshmive dhe sistemit automatik të njohjes së targave të automjeteve. Doherty u dënua me tre vite e nëntë muaj burg në qershor.

Rreshteri i detektivëve Ross Smith, i cili drejtoi hetimin ndaj Ferizit dhe Saliajt, deklaroi se autorët kishin shënjestruar qëllimisht familjet në banesat e tyre, duke u shkaktuar frikë dhe shqetësim emocional. Sipas tij, bashkimi i provave, veçanërisht të dhënat e kartave Oyster, ndihmoi policinë të ndërtonte një dosje të fortë hetimore dhe të lidhte autorët me grabitjet.