Kryeministri çek Andrej Babiš ka kërkuar falje pasi këputi disa lule në një zonë të mbrojtur në Lysá hora, një mal në lindje të Çekisë, duke thënë se do të paguante një gjobë nëse do të ishte e nevojshme.

Babiš tha në një video të publikuar në Facebook se i kishte këputur lulet ndërsa kujtonte një kolege të ndjerë të partisë së tij ANO, me të cilën më parë kishte ngjitur malin.

“Mund të kem shkelur ndonjë ligj, për të cilin kërkoj falje, dhe sigurisht që do ta paguaj gjobën nëse është e nevojshme, patjetër,” tha ai.

Pamjet e së shtunës, të publikuara në faqen e Babiš-it në Facebook, e treguan kryeministrin duke u ngjitur me një tufë të vogël lulesh, të cilat më pas i vendosi te një monument në majë të malit. Babiš shoqërohej nga dy ministra, politikanë të ANO-s dhe mbështetës të tij në majën 1,324 metra të lartë.

Një ekspert mjedisor, i tha medias lokale çeke iDNES se Babiš kishte këputur dy lloje krejtësisht të zakonshme dhe se kishte pak gjasa të përballej me ndonjë gjobë.