Shoqata Rajonale e Futbollit Tiranë ka zhvilluar këtë të martë Asamblenë e Përgjithshme Zgjedhore ku fillimisht është rizgjedhur kreu i saj Krenar Alimehmeti, i cili merr mandatin e dytë. Në rendin e ditës ishte edhe propozimi për kreun e ri të FSHF-së, pasi këtë vit do të mbahen zgjedhjet. Unanimisht, 45 anëtarët që morën pjesë nga 77, propozuan emrin e Armand Dukës, kreun aktual të FSHF-së që do të kërkojë mandatin e 7-të.

"Në rendin e ditës ishin edhe propozimet për kandidatë për President të FSHF-së dhe për anëtarë të Komitetit Ekzekutiv. Anëtarët e shoqatës kanë propozuar si kandidat z. Armand Duka për postin e Presidentit të FSHF-së, që u votua nga të gjithë anëtarët e shoqatës gjatë punimeve të asamblesë. Ndërsa, si kandidat për anëtar të Komitetit Ekzekutiv të Federatës Shqiptare të Futbollit, anëtarët e SHRF Tiranë votuan për z. Lutfi Nuriu,"-thuhet në njoftimin e Shoqatës Rajonale të Futbollit të Tiranës.

Deri më tani nuk ka asnjë të dhënë për rival të Dukës në këto zgjedhje, ndryshe nga vite më parë kur ka patur edhe shumë kontestime. Në vijim, brenda këtij viti, do caktohet data dhe do të mbahen zgjedhjet e reja.