Kërkoi masë më të lehtë sigurie, ish-zyrtarja Alda Klosi lihet në burg! Avokati: Apartamenti i sekuestruar në pronësi të ish burrit! S’ka pse të deklarojë paratë e vëllait

TIRANË- Gjykata e Apelit rrëzoi kërkesën e Alda Klosit dhe vendosi ta lë në qeli, duke mos marrë parasysh argumentet e ish-zyrtares se duhet të kujdeset për 2 fëmijët dhe nënën e sëmurë. Avokati i Klosit tha se klientja e tij nuk mund të qëndrojë në burg vetëm mbi dëshminë e pastrueses Rozeta Dobi, që sipas tij prokuroria ende nuk ka prova për ta vërtetuar.

Gjyqtarja Irena Brahimi rrëzoi kërkesën e Klosit e cila nuk ishte e pranishme në seancë dhe vendosi të vlerësojë të ligjshëm arrestimin e ish-zyrtares duke e lënë në masën e arrestit me burg.

Në hetimet që po kryen prokuroria e akuzon ish-shefen e kabinetit të Arben Ahmetajt për pastrim parash, fshehje të pasurisë  dhe deklarim të rremë para hetuesve.

Ish-zyrtarja Alda Klosi u mor në pyetje në ambientet e burgut 325, aty ku ndodhet që prej arrestimit. Atje ka deklaruar që 120 mijë euro ia kishte marrë hua vëllai një biznesmeni për kurimin e xhaxhait në Amerikë ndërsa 30 mijë dollarë ia kishin lënë xhaxhai me nusen për arredimin e shtëpisë. Kjo është hera e parë që Klosi pyetet nga oficerët e policisë gjyqësore që prej momentit të arrestimit, pasi Klosi shfaqi edhe probleme kardiake dhe u shtrua disa ditë në QSUT.

Në dëshminë që është marrë të enjten e 16 shkurtit, Klosi i ka qëndruar pretendimeve të mëparshme se pastruesja Rozerta Dobi i ka vjedhur nga shtëpia 120 mijë eurot, ndërsa pjesa tjetër e parave që pastrueses iu gjetën në tubin e aspirimit, 400 mijë euro thotë se nuk janë të saj. Mediat raportojnë se Klosi ka thënë para hetuesve se paratë janë të xhaxhit të saj, ndonëse bie në kontradiktë me dëshminë që i vëllai saj ka thënë në fillim se paratë ia ka marrë ai një biznesmeni.

Ish-zyrtarja Klosi përfundoi pas hekurave pas dëshmisë së pastrueses së saj Rozeta Dobi, e cili grabiti në shtëpinë e ish-zyrtares rreth 120 mijë euro.

E gjitha doli në dritë pasi në apartamentin e Alda Klosit në rrugën e Kosovarëve në Tiranë u raportua se pati vjedhje. Policia arrestoi si të dyshuar, pastruesen e shtëpisë, Rozeta Dobin dhe djalin e saj si bashkëpunëtor, Havier Dobin, por dëshmia e punonjëses së pastrimit ndryshoi gjithçka. Dobi tha se 120 mijë euro që policia i gjeti në banesë, nuk i ka vjedhur, por se Alda Klosi ia kishte dhënë vetë për t’i fshehur në banesë. Alda Klosi e pranoi para hetuesve se 120 mijë eurot ishin marrë nga shtëpia e saj, të marra hua nga vëllai për kurimin e xhaxhait me tumor që jeton në SHBA. 

Ajo çfarë thotë prokuroria ka nevojë të verifikohet dhe kjo nuk do të thotë që Alda Klosi të rrijë në burg deri sa të vërtetohen deklaratat e Rozeta Dobit. Qëndrimi i Alda Klosit është bërë publik. Ka pranuar faktin që 120 mijë euro i kishte hua nga vëllai për nevoja të kurimit të xhahxhit të ndjerë në Amerikë dhe 30 mijë euro ishin lënë nga xhaxhai dhe nusja për arredimin e shtëpisë

Një apartament dhe një garazh u sekuestrua nga prokuroria ndërsa të tjera pasuri janë në verifikim për burimin e tyre, por avokati i Alda Klosit Ilirjan Muho, thotë se apartamenti në fjalë është pronë që ish-bashkëshorti i saj e ka blerë pasi janë divorcuar dhe ka lënë të jetojnë fëmijët e tij. Pas arrestimit nga policia Alda Klosi pati probleme me shëndetin, ndërsa ndër argumentet kryesore për një masë më të burë sigurie, ajo paraqet faktin që duhet të kujdeset për 2 fëmijët e mitur dhe nënën e verbër që ka në kujdestari.

Rendit zhvillimet sipas orarit:

Të Fundit Të Parat

M.Q./G.MO/Shqiptarja.com

TAG:
• gjykata e apelit
• Tirane
• rozeta dobi
• ALDA KLOSI
• havier dobi
• Pastruesja vjedh shtëpitë VIP