KiE në Tiranë, Noka takon Volonte:
Vëzhgoni e bëni vlerësim real

TIRANE - Delegacioni i Ansamblesë Parlamentare të Këshillit të Europës i cili ndodhet në Tiranë prej ditës së djeshme do të vazhdojë sot takimet me kryeministrin, Berisha, presidentin Nishani.

Përfaqësuesit e Misionit Para-Zgjedhor të KiE, kryesuar nga  ish-parlamentari italian, Luca Volonte dje zhvilluan takim me kryetaren e KQZ, dhe ministrin e Brendshëm Flamur Noka. Ky i fundit "ftoi vëzhguesit që të monitorojnë nga afër procesin zgjedhor dhe të reflektojnë opinionin e tyre në mënyrë sa më reale"- informon zyra e shtypit e Ministrisë së Brendshme.
 
Sipas njoftimit për shtyp të dhënë nga kjo ministri, delegacioni i KiE është interesuar për hartimin e listave, të zgjedhësve sipas Kodit Zgjedhor dhe në përputhje me standardet ndërkombëtare, si dhe për mbarëvajtjen e procesit zgjedhor.

“Ministri Noka garantoi se këto janë listat më të mira të hartuara ndonjëherë, që janë përpiluar gjatë një procesi tërësisht transparent dhe ligjor, që do të ndikojnë absolutisht  në mbarëvajtjen e procesit zgjedhor. Ministri i Brendshëm garantoi Përfaqësuesit e Misionit Para-Zgjedhor të Asamblesë Parlamentare të Këshillit të Evropës, që Qeveria Shqiptare ka të gjithë vullnetin politik dhe angazhimin maksimal për të zhvilluar një proces zgjedhor tërësisht transparent, të lire dhe konform standardeve ndërkombëtare.”-  bën të ditur zyra e shtypit.

Ky delegacion pritet të ketë takime dhe me përfaqësues të forcave të ndryshme politike, që marrin pjesë në zgjedhje, dhe përfaqësues të trupit diplomatik dhe të shtypit e përfaqësues të shoqërisë civile.

Në orën 18:00, vëzhguesit do të mbajnë një konferencë për shtyp për mënyrën se si po zhvillohet fushata elektorale në Shqipëri.

(Foto: Takimi i Flamur Nokës me delegacionin e KiE)
Redaksia online
(sg/shqiptarja.com)

TAG:
• kqz