KLD-ja emëron në Gjykatën e Apelit
gjyqtarët që “liruan” Ilir Xhakjen

TIRANE - Evgjeni Sinoimeri dhe Valbona Vata janë dy gjyqtaret më të reja të Gjykatës së Apelit në Tiranë dhe Shkodër. Ato u betuan në mbledhjen e djeshme të Këshillit të Lartë të Drejtësisë, nën drejtimin e presidentit Bujar Nishani, njëkohësisht edhe kryetar i KLD-së. Po kush janë dy gjykatëset që do të shqyrtojnë çështje nga më të ndryshmet në shkallën e dytë të Gjyqësorit? Ato janë jopak të njohura, ndërkohë që emrat e tyre janë përfolur edhe kur diskutohej më mënyrën, se si i pati shpëtuar burgut për vrasje, Ilir Xhakja, i cili në shtatorin e vitit të kaluar, ekzekutoi komisarin e Shijakut, Adem Tahiri.

EVGJENI SINOIMERI
Gjyqtarja Sinoimeri u emërua në Gjykatën e Apelit në Tiranë. Ajo ka një CV të pasur me eksperienca pune dhe kualifikime, por mes dosjeve të gjykuara prej saj është edhe ajo e vitit 2009 me të pandehur Ilir Xhakjan. Sinoimeri ka qenë pjesë e Kolegjit Penal të Gjykatës së Lartë, i cili kryesohej nga Ardian Dvorani, me anëtarë Sinoimerin, Irma Balën, Ariana Fullanin dhe Aleksandër Muskajn. Pesëshja gjykuese vendosi në tetor të katër viteve më parë prishjen e vendimeve të Gjykatës së Apelit për Krime të Rënda dhe të Gjykatës së Shkallës së Parë për Krime të Rënda, që e dënonin me 21 vjet burgim të pandehurin Ilir Xhakja. Kolegji Penal vendosi dërgimin e çështjes për gjykim në Gjykatën e Shkallës së Parë Durrës, si gjykatë kompetente.

Në lidhje me këtë, gjyqtarët përdorën argumentimin se më datë 22.10.2004, hyri në fuqi ligji nr.9276, i datës 16.09.2004, në të cilin parashikohej se veprat penale për të cilat akuzohej Xhakja, ishin hequr nga kompetenca lëndore e Gjykatës së krimeve të Rënda dhe I kishin kaluar për kompetencë gjykatave të zakonshme të rretheve gjyqësore.” Pas dërgimit të dosjes në Gjykatën e Durrësit, kjo e fundit e dënoi Ilir Xhakjen vetëm për “armëmbajtje pa leje”.

VALBONA VATA
KLD emëroi Valbona Vatën në Gjykatën e Apelit të Shkodrës. Vata, ish-Kryeinspektore në Këshillin e Lartë të Drejtësisë në vitin 2009, rezulton të ketë qenë në dijeni për vendimin e Kolegjit Penal të Gjykatës së Lartë. Asokohe, kreu i Gjykatës së Durrësit Ervin Metalla, i kishte dërguar KLD-së informacion për gjyqtarët problematikë, mes tyre edhe ata që dënuan Xhakjan vetëm për akuzën e armëmbajtjes.

Por, pas dy shkresave të njëpasnjëshme, Metalla mësohet t’i ishte drejtuar Inspektoriatit të Lartë të Drejtësisë, drejtpërsëdrejti Kryeinspektores Valbona Vata. Shkresat e Metallës nuk morën kurrë përgjigje. Më 13 shkurt të një viti më parë, pas dorëheqjes së Kreshnik Spahiut nga posti i nënkryetarit të KLD-së, Vata u emërua zëvëndëse e komanduar e tij. Ajo e mbajti këtë post deri në emërimin e Elvis Çefës, si numri dy i KLD-së.

Shkrimi u publikua sot në gazetën Shqiptarja.com(print), 15 shkurt 2013
(ad.ti/shqiptarja.com)

/Shqiptarja.com