Të dy zyrtarët diskutuan për çështje të bashkëpunimit dypalësh, për situatën ndërkombëtare dhe zhvillimet e fundit, për angazhimet e përbashkëta në kuadër të NATO dhe BE. Ata ndanë mendimin se
Franca jep një kontribut të madh në modernizimin e FA dhe në arsimimin e oficerëve shqiptarë në shkollat më të mira franceze. Shembull i këtij bashkëpunimi të suksesshëm është misioni në Çad, ku Shqipëria ishte përkrah trupave franceze.
Kodheli i ka bërë me dije homologut të tij se në ndjekje të detyrimeve të FA për integrimin në BE, Ministria e Mbrojtjes është në proces shqyrtimi të mundësive për të kontribuar në misionin e BE, përkatësisht në Mali.
Ministrja Kodheli gjatë takimit nënvizoi se marrëdhëniet mes dy vendeve tona do të njohin vetëm rritje cilësore. Sipas saj, dy vendet tona duhet të rinovojnë marrëveshjen dypalëshe të bashkëpunimit, e cila daton që nga viti 1996.
Ministri francez i Mbrojtjes Jean-Yves Le Drian tha se mbështetja e Francës është e qartë dhe bashkëpunimi është tepër pozitiv. Ai gjatë takimit vlerësoi rolin që po luan Shqipëria si vend anëtar i NATO për stabilitetin rajonal dhe më gjerë.
“Mes dy vendeve tona ka një marrëdhënie të fortë dhe efektive”, nënvizoi ministri francez. Ai tha se: “Franca ndjek me shumë vëmendje pjesëmarrjen e trupave shqiptare në Afganistan dhe mirëpresim pjesëmarrjen tuaj edhe në operacione të BE”.
Kodheli e njohu homologun e saj me punën që po bën qeveria shqiptare, për të cilën tha se mbetet tërësisht e angazhuar në reformat e mëtejshme që afektojnë Ministrinë e Mbrojtjes në luftën kundër korrupsionit dhe në gjitha angazhimet që duhet të ndërmarrim, në kuadër të afrimit të Shqipërisë me Europën.
Në Planin e Bashkëpunimit Bilateral mes dy vendeve në fushën e mbrojtjes për vitin 2014, janë planifikuar 17 aktivitete të propozuara nga të dy palët, nga të cilat 8 do të zhvillohen në Francë dhe 9 në Shqipëri.
Redaksia Online
(a.h/shqiptarja.com)