POP 5

Lajmet më të lexuara të 5 minutave të fundit

Politikë

Komiteti i Stabilizimit:Ja deklarata
e rekomandimet për Shqipërinë

Pas punimeve dyditore të zhvilluara në Tiranë, kryetarët e Komitetit të Stabilizim -Asociimit kanë dalë në një deklaratë të përbashkët për shtyp, për të vënë në dukje jo vetëm arritjet e deritanishme.
TIRANË - Pas punimeve dy ditore të zhvilluara në Tiranë, kryetarët e Komitetit të Stabilizim -Asociimit kanë dalë në një deklaratë të përbashkët për shtyp, për të vënë në dukje jo vetëm arritjet e deritanishme, por më së shumti, detyrimet që rrjedhin si nevojë për marrjen e statusit të vendit kandidat. 

Kryetarët Taulant Balla dhe Eduard Kukan, e cilësuan mjaft pozitiv qëndrimin e KE-së për marrjen e statusit, por theksuan domosdoshmërinë e përmbushjes së rekomandimeve të dhëna nga ky komision.

Pasi shkëmbyen mendime me ministrin e Punëve të Jashtme, Ditmir Bushati, Ettore Sequin si kryetar i Delegacionit të Bashkimit Evropian në Shqipëri mbi situatën aktuale të marrëdhënieve BE- Shqipëri; zbatimin e ligjeve për luftën kundër korrupsionit dhe krimit të organizuar; reforma në gjyqësor dhe administratën publike; mbrojtja e mjedisit; zhvillimet në ekonomi, me fokus në sektorin e energjisë; bashkëpunimi rajonal, Komisioni Parlamentar për Stabilizim Asociimin, në përputhje me Nenin 3 të Rregullores së Procedurës dhe artikullin 122 të marrëveshjes, i adresoi këtë Deklarate dhe Rekomandime Këshillit të Stabilizim-Asociimit dhe institucioneve shqiptare dhe atyre të Bashkimit Evropian:

DEKLARATA DHE REKOMANDIMET NGA BE

Komisioni përgëzoi të gjitha forcat politike për përgatitjen dhe zhvillimin e rregullt të zgjedhjeve të fundit parlamentare dhe kalimin e qetë të pushtetit; 

Konsideroi thelbësore mbështetjen e një dialogu të mirëfilltë politik, gjithëpërfshirjen dhe konsensusin mes të gjitha palëve në mënyrë që të arrihen kompromise si çelësi i progres në proceset politike; 

Shprehu mbështetje e plotë për anëtarësimin e ardhshëm të Shqipërisë në Bashkimin Evropian, mirëpret dhe mbështet rekomandimin e Komisionit për dhënien e statusit kandidat në BE të Shqipërisë dhe i bën thirrje Këshillit të ndjek këtë rekomandim pa vonesa; fton shumicën qeverisëse dhe opozitën që të mbështesin bashkëpunimin ndërpartiak dhe të kontribuojnë në miratimin e suksesshëm dhe zbatimin rigoroz të reformave kyçe; 

I bëri thirrje Shqipërisë që të vazhdojë të japë rezultate në prioritetet kyçe të Opinionin të Komisionit të vitit 2010,  në veçanti për sa i përket respektimit të shtetit të së drejtës, luftës kundër korrupsionit dhe krimit të organizuar, gjithashtu duke krijuar një historik të qëndrueshëm të zbatimit; 

Vuri në dukje një përparim në reformën gjyqësore dhe bëhet thirrje për përpjekje të mëtejshme për të forcuar përgjegjshmërinë, pavarësinë, paanësinë dhe efikasitetin e sistemit gjyqësor, duke përfshirë edhe Këshillin e Lartë të Drejtësisë; 

I bëri thirrje parlamentit dhe qeverisë për të ruajtur dhe për të nxitur integritetin dhe pavarësinë e institucioneve kyçe të tilla si Këshilli i Lartë i Drejtësisë, Inspektorati i Lartë për Deklarimin dhe Kontrollin e Pasurive, Autoriteti i Mediave Audiovizuale, Instituti Kombëtar i Statistikave, etj; 

Përshëndeti përparimin e bërë në luftën kundër krimit të organizuar, veçanërisht sa i përket zbatimit të legjislacionit anti-mafia, duke përfshirë konfiskimin në rritje të aseteve kriminale; vë në dukje se bashkëpunimi i policisë ndërkombëtare ka vazhduar të arrijë rezultate të mira në efikasitetin e operacioneve policore, arrestime dhe hetime; i bëhet thirrje autoriteteve të sqarojnë rolin e Departamentit të Kontrollit të Brendshëm dhe Anti-korrupsionit dhe të rrisin kapacitetet në sa i përket  mekanizmave në fushën e kontrollit të brendshëm, të sigurojnë  Njësi të Përbashkëta Hetimore me burime të mjaftueshme për të përmbushur përgjegjësitë e tyre; 

Ndërsa është bërë njëfarë progresi në luftën kundër korrupsionit, Komisioni shprehu shqetësim se korrupsioni vazhdon të jetë një problem serioz;  bëri thirrje për një angazhim më të fortë politik për të bërë progres të qëndrueshëm në hetime dhe dënime, përfshirë rastet e korrupsionit në nivele të lartë dhe në rastet e provave të qarta; 

I bëri thirrje qeverisë që të garantojë plotësisht respektimin e ligje ve të punës në sektorët publikë dhe private dhe të sigurojë respektimin e të drejtave të sindikatave; 

Përshëndeti marrëveshjen ndër-qeveritare të nënshkruar nga Shqipëria, Italia dhe Greqia, në të cilën konfirmohet mbështetja e tyre për projektin e gazsjellësit Trans-Adriatik dhe memorandumin e mirëkuptimit për bashkëpunimin dhe mbështetjen e projekteve të gazsjellëseve Trans-Adriatik dhe Adriatiko-Jonian, nënshkruar nga Shqipëria, Bosnja dhe Hercegovina, Mali i Zi dhe Kroacia; 

Theksoi nevojën për t’i kushtuar vëmendje të veçantë sektorit të energjisë dhe sigurisë se energjisë, duke përfshirë diversifikimin e burimeve të energjisë, bëri thirrje për përparim më të madh në fushën e mbrojtjes së mjedisit dhe ndryshimeve klimatike, për zbatimin e plotë të legjislacionit mbi mjedisin dhe bashkëpunimit të ngushtë rajonal për promovimin e qëndrueshmërisë mjedisore; i bëri thirrje qeverisë që të ketë si prioritet ruajtjen e peizazhit unik natyror të Shqipërisë dhe zhvillimin e turizmit duke ruajtur mjedisin; 

Ndërsa vërejti rritjen ekonomike në Shqipëri, ftoi autoritetet përkatëse të ruajnë stabilitetin  makroekonomik dhe social, duke forcuar më tej mbledhjen e taksave dhe luftën kundër ekonomisë informale të cilat janë të rëndësishme për kohezionin social dhe perspektivat ekonomike; 

I bëri thirrje autoriteteve për të ndërmarrë veprime konkrete, në përmbushjen e kërkesave të BE-së, në respektimin e të drejtave të pronësisë, si një prej prioriteteve kyçe të Opinionit të Komisionit të 2010-s; 

Mirëpriti faktin që qeveria e re ka në përbërjen e saj gjashtë ministre gra dhe shpresoi që kjo do të reflektohet në shoqëri ku gratë vazhdojnë të jenë të diskriminuara. 
 
Redaksia Online
(ac/a.ç/mag/shqiptarja.com)

/Shqiptarja.com
  • Sondazhi i ditës: 13 Janar, 10:25

    Nisi regjistrimi, a do të marrë pjesë masivisht në zgjedhje diaspora?

Lajme të tjera



×

Lajmi i fundit

Spanjë/ Kapet gomonia me sasi të madhe kokaine, arrestohen 7 shqiptarë

Spanjë/ Kapet gomonia me sasi të madhe kokaine, arrestohen 7 shqiptarë

15 Janar, 21:46