Korçë/Mbyllen hetimet dhe çohet në gjyq Alma Beqiri! Akuzohet se mori 3 milionë euro klientëve të postës private dhe i investoi në prona e biznese

Prokuroria Korçë dërgon në gjyq Alma Beqirin ish agjente e shërbimit postar ADEX në Korçë pasi akuzohet se nëpërmjet mashtrimit ka pwrfituar një vlerë rreth 3 milionë euro.

46-vjeçarja  akuzohet se pasi shpërndante pako të ndryshme postare, për llogari të subjekteve të treta dhe shumat monetare që i arkëtonte nga klientët, nuk i ka derdhur në llogarinë e subjekteve tregtare shitëse dhe as tek kompania që kryente këtë shërbim.

Shumën e konsiderueshme dyshohet se e ka investuar në blerjen e pasurive të paluajtshme dhe të bizneseve tregtare, në emër të vet dhe të familjarëve të saj.

"Nga hetimet rezultoi se si agjente rajonale e shoqërise postare “Adex”, me pronar viktimën F.Z., e pandehura ka kryer transaksione të shumfishta fiktive duke blerë mallra tek persona të tjerë dhe duke raportuar fiktivisht se këto mallra ishin paguar. Në të njëjtën kohë, duke marrë pagesat e mallrave tek persona të tretë, e pandehura i ka raportuar si të paguara por duke mos depozituar pagesat në llogarinë e shoqërisë Adex duke përfituar në këtë mënyrë nëpërmjet mashtrimit një vlerë rreth 3 milionë euro" informoi sot SPAK.

Me urdhër të Prokurorit, Beqiri është ndaluar dhe iu sekuestruan disa automjete luksoze të cilat janë produkt i veprës penale të mashtrimit, të cilat ajo i kishte vendosur në emër të të afërmve të saj.

Ndërkohë Prokuroria Korçë thotë se po heton paralelisht për veprën penale “Pastrimi i produkteve të veprës penale dhe veprimtarisë kriminale” parashikuar nga neni 287 i Kodit Penal për të identifikuar pasuri të tjera me origjinë të paligjshme dhe për të identifikuar dhe vënë nën përgjegjësi penale personat e përfshirë.

S.G/r.k./Shqiptarja.com

TAG:
• Korce
• ALMA BEQIRI
• adex