KQZ miraton fondin prej 65 milionë
lekësh për partitë politike

TIRANE- Komisioni Qendror i Zgjedhjeve miratoi sot fondin prej 65 milionë lekë që do t’u shpërndahet si paradhënie partive të regjistruara si subjekte zgjedhore, për zgjedhjet e Kuvendit të datës 23 Qershor 2013.
 
Nga ky fond, PD dhe PS do të përfitojnë pjesën dërrmuese. Kështu, Partia Socialiste, e cila është renditur e para në zgjedhjet e 2009-s për numrin e votave, do të sigurojë 26.115.596 lekë, ndërsa Partia Demokratike, e renditur e dyta me 10 mijë vota më pak, do të marrë 25.688.615 lekë. 

Lëvizja Socialiste për Integrim do të përfitojë 3.1 milionë lekë. Mbi 1 milionë lekë arrijnë që të sigurojnë edhe dy parti të tjera politike, Partia Republikane dhe Partia Socialdemokrate. Me vlera më të ulëta vijojnë partitë e tjera, të cilat kanë siguruar një numër më të vogël votash në zgjedhjet e kaluara, si Partia Bashkimi për të Drejtat e Njeriut, Partia për Drejtësi, Integrim dhe Unitet, etj. 

Të 13 subjektet politike kanë siguruar në 2009-n 1.467.424 vota dhe në total do të përfitojnë 61.750.000 lekë. Pjesa e mbetur nga fondi 65 milionë lekë do t’u shpërndahet 53 partive të tjera politike. Të gjitha këto parti të mbetura do të marrin nga 61 mijë lekë.
 
Ndërkaq, në mbledhjen e sotme, KQZ ka miratuar edhe projekt-vendim: “Për miratimin e vëzhguesve të Institutit Demokratik të Kosovës (KDI), për vëzhgimin e zgjedhjeve për Kuvend, të datës 23 Qershor 2013”.

Redaksia Online
(e.s/shqiptarja.com)

TAG:
• kqz