KQZ shpall rezultatet e zgjedhjeve
në 1 dhjetor votohet në disa komuna

PRISHTINE- Janë shpallur nga KQZ-ja rezultatet përfundimtare të zgjedhjeve lokale të zhvilluara në Kosovë, ditën e dielë datë 3 nëntor 2013-të.

Lista e Përbashkët Serbe ka nxjerrë fitues në tre komunat veriore pa balotazh. Pesë kandidatë në gjithë Kosovën kanë më pak se 70 vota, ndërsa tre më të votuarit në Kosovë, kanë më shumë se 20 mijë vota.

Nuk ka qenë i nevojshëm balotazhi në 13 Komuna, ku janë zgjedhur kryetarët e tyre, ndërkohë që në Komunat e tjera do të votohet sërish në 1 dhjetor 2013-të.

Ndërkohë që nuk ka asnjë rezultat përsa i përket Mitrovicës, në veri të Kosovës, pasi në tre qendra të kësaj zone, do të votohet sërisht, ditën e dielë, datë 17 nëntor.

Gjithashtu, për të evituar ndonjë incident të mundshëm në këtë zonë, Policia e Kosovës, EULEX-i dhe KFOR-i nëpërmjet një deklarate, kanë njoftuar se do të jenë në gadishmëri të plotë për mbarëvajtjen e procesit zgjedhor të datës 17 nëntor.

Në përfundim të kësaj deklarate, thuhet se nëse do të cënohej procesi zgjedhor apo siguria e votuesve, stafit, apo të vëzhguesve në këto qendra votimi, Policia e Kosovës, EULEX-i dhe KFOR-i janë të përgatitur për një ndërhyrje të menjëhershme.

Sipas mediave kosovare, duket të jetë një koordinim mjaft i mirë mes Policisë së Kosovës, EULEX-it, KFOR-it dhe OSBE-së.

Redaksia Online
(e.b/e.s/shqiptarja.com)

TAG:
• kqz
• OSBE