KQZ: Sot skadon koha për KZAZ 
 afati të respektohet nga partitë

Data 9 prill është afati i fundit që partitë politike kanë në dispozicion për dorëzimin e propozimeve për anëtar të KZAZ, ndërsa afati përfundimtar i regjistrimit të partive politike që Do të marrin pjesë në zgjedhjet lokale të 21 qershorit është data 14 prill.

Zëdhënësja e KQZ apeloi partitë politike që të respektojnë këto afate ndërsa u kujtoi komiteteve nismëtare për paraqitjen e kandidaturave të propozuara nga zgjedhësit se afati final është data 18 prill.

Deklarata e Zëdhënëses së KQZ-së, Drilona Hoxhaj
Komisioni Qendror i Zgjedhjeve në mbledhjen e sotme, miratoi një nga aktet më të rëndësishme, “Rregulloren për organizimin dhe funksionimin e KQZ-së”, të cilën KQZ nuk kishte arritur ta miratonte që prej vitit 2008. Rregullorja për Organizimin dhe Funksionimin e KQZ-së, u miratua me konsensusin e plotë të Anëtarëve të KQZ-së dhe pas një konsultimi të gjërë me përfaqësuesit e partive politike parlamentare dhe  ekspertëve të Këshillit të Europës dhe OSBE-së. 

Gjithashtu, ju bëjmë me dije se në zbatim të nenit  184, pika 3 e Kodit Zgjedhor, të ndryshuar, KQZ-ja me vendimin nr. 87 të datës 07.04.2015, ka miratuar disa afate proceduriale shumë të rëndësishme për procesin zgjedhor  si: miratimi i afateve për ngritjen e KZAZ-ve dhe depozitimin e dokumentacionit të kandidimit në KZAZ nga Grupet Nismëtare, për zgjedhjet për Organet e qeverisjes vendore, të datës 21 qershor 2015, si pasojë e ndryshimeve në Kodin Zgjedhor”.
Në këtë kontekst,  KQZ ju rikujton partive politike se: data 9 prill 2015 është afati i fundit për dorëzimin e propozimeve të kandidtaurave  për anëtar të KZAZ-së.

Data 14 prill 2015, është data e zhvillimit të mbledhjes së parë të KZAZ-ve të ngritura në të gjithë vendin.

Data 14 prill është afati i fundit për regjistrimin e partive politike që do të marrin pjesë në zgjedhjet e datës 21 qershor.

data 18 prill 2015 është afati i fundit për depozitimin e kërkesave nga Komitetet nismëtare për paraqitjen e kandidateve të propozuar nga zgjedhësit. 

Gjithashtu, përmes kësaj dekarate publike ju bëjmë thirrje Kryetarëve të Njësive të Qeverisjes Vendore që t’i sjellin menjëherë pranë KQZ-së  propozimet e tyre për ambientet ku do të vendosen zyrat e KZAZ-ve,  pasi afati i miratuar nga KQZ për konstituimin e KZAZ-ve është data 14 prill.
 
Faleminderit

 
Redaksia Online
(a.h/shqiptarja.com)

TAG:
• kqz
• OSBE