Presidenti i FSHF-së, Armand Duka nga sot do të jetë edhe në postin e zv.presidentit të UEFA-s, duke u bërë i pari shqiptar që arrin një pozicion kaq të lartë në hierarkinë e futbollit europian.

Vendimi u mor sot në mbledhjen e radhës së Komitetit Ekzekutiv të UEFA-s, që zgjodhi pikërisht presidentin Duka me votim unanim në postin e rëndësishëm të qeverisë së futbollit europian. Kujtojmë se UEFA ka pesë ndihmësa të kreut Aleksandër Ceferin dhe mes tyre do jetë edhe Duka.

Pas largimit të Luis Rubiales, ish-kreut të federatës spanjolle pas skandalit seksual në Kupën e Botës për femra, u krijua vendi i lirë për zv.presidentin e pestë. Me postin e mbetur bosh dhe pas votimit në mbledhjen e Komitetit Ekzekutiv të mbajtur sot në Qipro, Armand Duka merr këtë pozicion të rëndësishëm.

Kujtojmë se Duka prej pesë mandatesh është në krye të futbollit shqiptar, teksa për mandatin e dytë 2-vjeçar mban një vend në Komitetin Ekzekutiv të UEFA-s.

Pas Zbigniew Boniek, Sándor Csányi, Fernando Gomes dhe Michele Uva, Armand Duka bëhet zv.presidenti i pestë i UEFA-s.

Rendit zhvillimet sipas orarit:
Ora 16:11
U zgjodh zv/president i UEFA-s, Armand Duka përfiton pagën e majme


 

Armand Duka u zgjodh një nga pesë zëvendëspresidentët e UEFA-s. Këtë të martë në Qipro, në mbledhjen e Komitetit Ekzekutiv, kreu i FSHF-së siguroi mandatin deri në 2027. Tanimë edhe paga e tij do jetë më e madhe, teksa më herët ka qenë vetën pjesë e Komitetit Ekzekutiv. 250 mijë euro në vit është paga e zëvendëspresidentit të UEFA-s, që e përkthyer do të thotë afro 21 mijë euro në muaj.

S.Dh/Shqiptarja.com