Krimet e Rënda "arrest me burg"
Ilir Karçinit. E mbron Sollaku

TIRANE- Gjykata e Krimeve të Rënda ka konfirmuar masën e "arrestit me burg", për biznesmenin e gazit Ilir Karçini. Ky i fundit akuzohet se, ka paguar 120 mijë euro për vrasjen e biznesmenit, Piro Bare.

Gjatë marrjes në pyetje, Karçini ka pranuar konfliktet me biznesmenin e gazit Piro Bare, por mohon të ketë paguar apo urdhëruar vrasjen e tij.

Seanca për rivlerësimin e masës së sigurisë ndaj Karçinit ka nisur rreth orës 10:30 të mëngjesit të sotëm dhe në sallë i pandehuri është mbrojtur nga ish-kryeprokurori Theodhori Sollaku
 
Karçini u arrestua më 1 shkurt 2014 pasi dyshohet se ka paguar 120 mijë euro për ekzekutimin e pronarit të ”Porto Romanos”, por Karçini mësohet se u ka deklaruar hetuesve se nuk ka patur asnjë arsye të paguajë apo urdhërojë vrasjen e Bares.

ORA 11: 10 NGEL NË QELI BIZNESMENI ILIR KARÇINI
Mbetet në burg biznesmeni i gazit, Ilir Karçini, i akuzuar për sigurimin e mjeteve për eliminimin fizik ndaj rivalit të tij në biznes Pirro Bare, duke paguar 120 mijë euro tek Andon Mëhillaj i cili më pas kishte kontraktuar vrasësin Julian Sinanaj.
 
Gjykatësja Etleva Deda ka vendosur të lërë pas hekurave Karçinin, duke vlerësuar të ligjshëm arrestit me burg të dhënë në mungesë për biznesmenin tre ditë më parë nga gjykata e krimeve të rënda si dhe duke pranuar kërkesën e prokurorëve Ardian Nezha dhe Behar Dibra.
 
Karçini është paraqitur në seancë gjyqësore me avokatin e tij mbrojtës, ish-Kryeprokurorin Theodhori Sollaku, ndërsa e pranishme në sallë ka qenë dhe bashkëshortja e biznesmenit. Avokati Sollaku, kërkoi nga gjykata të ndryshojë masën e sigurisë nga arrest me burg në një masë lehtësuese për Karçinin.
 
Por me argumentin se në këtë fazë ku ndodhen hetimet Karçini, mund të ndikojë në prishjen e provave për aq kohë sa nuk janë arrestuar dhe dy kushërinjtë Genis dhe Andon Mëhillaj, të dyshuar si krerët e bandës së tritolit, gjyqtarja Deda vendosi të konfirmoj arrest me burg për biznesmenin fierak.