Kriza e klimës, New York shpall emergjencën, në Japoni 17 viktima nga acari! Shkencëtarët: Do kemi më shpesh acar si në Amerikë

Shteti i Nju Jorkut ka shpallur emergjencën për shkak të viktimave të shumta si pasojë e acarit që kaploi vendin.

Autoritetet njoftojnë se 28 persona kanë humbur jetën në Nju Jork, nga rreth 60 në të gjithë Amerikën. Mbrëmjen e së hënës, lartësia e dëborës në disa vende arriti deri në 2 metër.

Nga 28 vdekjet e konfirmuara në Nju Jork, autoritetet thanë se arsyet janë vonesa e mbërritjes së ambulancës, ndalimi i zemrës gjatë heqjes së dëborës me lopatë, katër kanë vdekur nga i ftohi, ndërsa tre persona janë gjetur të ngirë në një automjet.

Vdekje të lidhura me stuhinë janë regjistruar në 12 shtete - Kolorado, Illinois, Kansas, Kentaki, Michigan, Misuri, Nebraska, Nju Jork, Ohio, Oklahoma, Tenesi dhe Ëisconsin.

Ndërkohë, edhe në Japoni paraqitet situatë tejet e rënduar si pasojë e reshjeve të dendura të dëborës. Të paktën 17 persona kanë humbur jetën dhe 93 janë lënduar. Autoritetet paralajmëruan banorët që të tregojnë kujdes gjatë largimit të borës nga shtëpitë e tyre, sepse shumë prej vdekjeve kanë ndodhur kur po pastronin borën nga çatitë dhe ajo i ka zënë sipër.

Masa e ftohtë e ajrit ka lëvizur edhe drejt Kanadasë, por nuk raportohet për viktima, veçse dëme në sistemin elektrik dhe reshje të mëdha dëbore.

Ndërkaq, shkencëtarët e klimës kanë një paralajmërim për këtë stuhi të fortë që ka përfshirë kontinente. Sipas tyre, nëse nuk merren masa kundër ngrohjes globale, këto fenomene do të shpeshtohen në të ardhmen.

G.MO/r.k./Shqiptarja.com

TAG:
• New York
• moti i keq
• Japoni