Kryebashkiakja e Përrenjasit i shkruan Sorecës për bllokimin e buxhetit, ambasadori: Nuk është roli i delegacionit!

Kryetarja e Bashkisë së Përrenjasit, Miranda Rira në fillim të marsit i kishte shkuar një letër ambasadorit të Bashkimit Evropian në Tiranë, Luigi Soreca, i cili i ka kthyer përgjigje disa ditë më parë për mosmiratimin e buxhetit të vitit 2019.

Në letrën e tij, kryediplomati i Bashkimit Evropian shpreh shqetësim për faktin që ngërçet politike ndikojnë tek qytetarët duke i lënë ata pa shërbime, por thotë se përgjegjësia për normalizimin e situatës i përket institucioneve shqiptare. Ambasadori përmend Ministrinë e Brendshme e cila është përgjegjëse për cështjet lokale në administratën shqiptare.

Kryebashkiakja e Përrenjasit, e cila ka publikuar letrën me përgjigjen e Sorecës, thotë se bllokimi dhe mosmiratimi i buxhetit është bërë nga këshilltarët e Partisë Socialiste, kryetarja e Këshillit Bashkiak dhe deputetët e PS-së. "Kjo situatë dëmton në mënyrë themelore banorët e Perrënjasit të cilët presin shërbime dhe të mira materiale" , thotë Rira.

"I bëjmë thirrje në veçanti, llogaritarit të kooperativës së tipit të lartë, pseudo-deputetit Nuri Belba , mos vazhdojë me presionet e tij ndaj këshilltarëve, të cilëve duke ngrënë gjizë nëpër lokale ju thotë “mos e miratoni buxhetin ose e shtyni sa më gjatë, që kur të vimë ne, të kemi naj lek”. Duke bllokuar ushqimin e fëmijëve në kopësht dhe në çerdhe, duke lënë 40.000 mijë banorë pa shërbime, duke lënë Prrenjasin të fundit nga 61 bashki të vendit tonë, “nuk keni për të ardhur kurrë” , por do ta merrni pas qafe, atë që meritoni", shkruan Miranda Rira në rrjetin social Facebook.

G.M./Shqiptarja.com

TAG:
• Miranda Rira
• Luigi Soreca