Grupi parlamentar i Partisë Socialiste u mblodh sot në takim në Kryesinë e Kuvendit me prezencë dhe të kryeministrit Edi Rama.

Kjo mbledhje raportohet të jetë rutinë për të diskutuar mbi axhendën parlamentare. Ndër të tjera, gazetarja e Report Tv Raziela Myslimaj raporton se Rama u ka lënë si porosi daljen në terren dhe takimet e vazhdueshme me qytetarët ku ka pohuar se do të jetë dhe vetë prezent.

Kryeministri është shprehur se do të jetë i vëmendshëm nëse kjo porosi e tij është zbatuar nga deputetët dhe ministrat në kuadër të turit “Punët për Shqipërinë”. Edhe pse në mbledhjen e grupit parlamentar, vëmendje u ka kërkuar t’i kushtojnë edhe procesit të zgjedhjeve të brendshme në parti.

Tashmë Partia Socialiste ka nisur me turin ‘Punët për Shqipërinë’, me në fokus administrimin e problematikave të qytetarëve kudo në vend dhe ndezjen e ‘motorëve’ për zgjedhjet lokale që priten të mbahen pranverën e ardhshme.

Rendit zhvillimet sipas orarit:
Ora 19:42
Rama publikon pamjet e mbledhjes së grupit socialist: Kjo forcë ka në dorë fatin e integrimit europian

Kryeministri Edi Rama përmes një postimi në “Facebook” ka ndarë pamje nga mbledhja e cila u zhvillua këtë të martë me Grupin Parlamentar të PS. Në videon e shpërndarë janë momente nga mbledhja dhe disa nga pikat kryesore të fjalimit të tij ku në focus ishte anëtarësimi i vendit në BE.

“PËR PUNËT E SHQIPËRISË 

Më ka bërë përshtypje angazhimi dhe dëshira për të dëgjuar e çdo asambleje faktikisht. 

Për punët e Shqipërisë ndryshe nga më parë kur flet për ekonominë, e ndjen nga atmosfera në sallë, që ka një pranim të faktit, që ekonomia ka hyrë në një rrugë që i jep të gjithëve shpresë se ka vetëm përmirësim.

Kur flet për pagat është shumë e qartë që njerëzit janë në gjendje të bëjnë menjëherë verifikimin tek vetja dhe tek të tjerët përreth.

SHQIPËRIA 2030 NË BE 

Kjo është sfida e sfidave jo për ne, por është sfida e sfidave për një forcë politike që gjendet me fatin e vendit në duar që ne të mbyllim një varg kapitujsh të historisë duke vulosur përkatësinë europiane të Shqipërisë edhe duke siguruar anëtarësimin e Shqipërisë në Bashkimin Europian.

ZGJEDHJET NË PARTINË SOCIALISTE 

Ne kemi hyrë në këtë proces për të energjizuar komplet Partinë Socialiste në funksion të zgjedhjeve vendore. Se përballë ne kemi vetëm veten, sfidën që kemi për të realizuar misionin tonë.

”, tha ai ndër të tjera në videon e shpërndarë në rrjetet sociale.

K.M/Shqiptarja.com