Sir Keir Starmer thotë se marrëdhënia mes Mbretërisë së Bashkuar dhe Kinës është në një “gjendje të mirë dhe të fortë” pas bisedimeve “produktive” me udhëheqësin kinez Xi Jinping në Pekin.

Kryeministri britanik u shpreh pas takimit se ka përparime në çështje që përfshijnë tarifat për uiskin dhe udhëtimin pa viza drejt Kinës, pasi më herët kishte deklaruar se dy vendet duhet të ndërtojnë një “marrëdhënie më të sofistikuar”.

“Jam këtu sot me interesat e popullit britanik në mendje. Bëra një premtim 18 muaj më parë, kur u zgjodhëm në qeveri, se do ta bëja Britaninë të shikonte sërish nga jashtë. Sepse, siç e dimë të gjithë, ngjarjet jashtë vendit ndikojnë në gjithçka që ndodh në vendet tona nga çmimet në raftet e supermarketeve deri te sa të sigurt ndihemi”, tha ai gjatë konferencës.

Kurse Xi tha se marrëdhëniet Kinë–Mbretëri e Bashkuar kanë pasur “kthesa dhe lëkundje”, por se angazhimi është “i pashmangshëm”.

Duke e përshkruar gjendjen e botës si “të trazuar dhe të ndryshueshme”, Xi tha se më shumë dialog mes Mbretërisë së Bashkuar dhe Kinës ishte “i domosdoshëm”, qoftë “për hir të paqes dhe stabilitetit botëror, apo për ekonomitë dhe popujt e dy vendeve tona”.

“Në të kaluarën, qeveritë laburiste kanë dhënë kontribute të rëndësishme në rritjen e marrëdhënieve Kinë-Mbretëri e Bashkuar. Kina është e gatshme të zhvillojë me Mbretërinë e Bashkuar një partneritet strategjik afatgjatë dhe të qëndrueshëm. Kjo do t’u sjellë përfitime dy popujve tanë. Angazhimi me Kinën është një çështje e pashmangshme dhe unë shpreh vlerësimin tim për këtë. Gjërat e mira shpesh kërkojnë kohë dhe përpjekje. Për sa kohë që diçka është gjëja e duhur për t’u bërë dhe u shërben interesave themelore të vendeve dhe popujve tanë… ne duhet të kemi një perspektivë afatgjatë,” tha Xi, duke shtuar se të dy vendet duhet të “ngrihen mbi dallimet dhe të ruajnë respektin e ndërsjellë”.

Presidenti citoi gjithashtu një proverb kinez: “Hidhe shikimin larg, në distanca të gjata.”

Starmer tha pas takimit se “vepron gjithmonë në interes kombëtar”. Ai shtoi se shfrytëzimi i mundësive që sjellin lidhjet më të ngushta me Kinën do të ndihmojë në lehtësimin e kostos së jetesës në Mbretërinë e Bashkuar.

I pyetur se sa me forcë e ngriti çështjen e Jimmy Lai dhe trajtimin e ujgurëve, Starmer tha: “Ne i ngritëm këto çështje, siç do të prisnit. Një pjesë e arsyes për angazhimin është të sigurohemi që mund të shfrytëzojmë mundësitë që janë të disponueshme, gjë që e kemi bërë, por edhe të kemi një diskutim të pjekur për çështjet për të cilat nuk biem dakord.”

Kina është akuzuar për kryerjen e krimeve kundër njerëzimit ndaj popullsisë ujgure dhe grupeve të tjera etnike kryesisht myslimane në rajonin veriperëndimor të Xinjiangut.

Starmer tani po viziton Qytetin e Ndaluar dhe më pas do të jetë dëshmitar i nënshkrimit të marrëveshjeve me kryeministrin kinez Li Qiang.

Xi dhe Starmer pritet gjithashtu të japin miratimin për një “pakt sigurie kufitare” me synimin për të ndërprerë furnizimin me motorë për varkat e vogla.

Hera e fundit që dy udhëheqësit u takuan ishte në nëntor 2024, në kuadër të Samitit të G20-s në Brazil.

 

 

Rendit zhvillimet sipas orarit:
Ora 09:27
Humbja e Arsenalit si fitore për diplomacinë, dhurata e veçantë e Starmer për Xi Jinping
Xi Jinping dhe Keir Starmer

Gjatë takimit me presidentin kinez Xi Jinping në Pekin, kryeministri britanik Keir Starmer i dorëzoi presidentit kinez një dhuratë mjaft të pazakontë: topin e futbollit të përdorur në ndeshjen e fundjavës së kaluar të Premier League angleze mes Manchester United dhe Arsenalit.

BBC shkruan se Xi është tifoz i Manchester United, që mundi Arsenalin, ekipin që Starmer mbështet, me rezultat 3–2 të dielën.

Në vitin 2015, ESPN e përshkroi presidentin kinez si “i fiksuar pas Manchester United”, duke vënë në dukje se gjatë vizitës së tij në Britani po atë vit, Xi iu ofrua në mënyrë disi të çuditshme një tur VIP në stadiumin Etihad, “shtëpia e rivalëve të përbetuar të United në të njëjtin qytet, Manchester City”.

Starmer, një tifoz i zjarrtë i futbollit që shihet rregullisht në ndeshjet e Arsenalit, me gjasë e pa këtë dhuratë si një mënyrë për të krijuar një lidhje personale me Xi.

Nuk është hera e parë që një udhëheqës britanik i ka dhuruar presidentit kinez një dhuratë të veçantë. Në vitin 2018, Theresa May i dhuroi Xi një set DVD-sh të serisë dokumentare me shtatë pjesë të BBC-së për historinë natyrore, Blue Planet II.

Kopja që May i dha Xi thuhet se kishte një mesazh të regjistruar posaçërisht nga vetë Sir David Attenborough, me synimin për të theksuar vendosmërinë e të dy vendeve për të ndaluar ndotjen plastike.

 

P.J/Shqiptarja.com